Maham ki pulit ka WKH ia kiba dang pynsaphriang ia ka dur khih
Nongstoin, Jylliew 29 : Ki Pulit ka West Khasi Hills, kila pyntip ba u briew uba shoh ia ka kynthei ha surok Nongstoin By-pass u dei u kurim barim bad ia une u briew la kem noh da ki Pulit.
Ia une u briew u dei na ka shnong Mawkadiang, West Khasi Hills. Kat kum ka jingong ki Pulit, katei ka jingjia, kala jia ha ka janmiet sngi U Blei (28 tarik Jylliew) ha jingkieng jong ka Wah Umrisaw.
Ki Pulit kila register da ka suo motu case pyrshah ia une u briew haba pynshong nongrim ia ka video kaba la saphriang ha ki social media-kaba pyni ba ula thap bad kyrdem ia kane ka kynthei na ki bynta jong ka khlieh.
Ka kum ka jingong ki Pulit, ia une u briew la ioh ban kem da ka VDPCNA bad VDP Mawkadiang ha ka janmiet 28 tarik Jylliew bad hadien la aiti noh sha ki Pulit ka Nongstoin Police Station.
Ka VDPCNA ka la maham ruh ba nangne shakhmat lada lap ia kino kino kiba leh ia ki kam kiba pynthut ia ka shong suk shong sain khamtam ha ki jaka jong ka bye pass, yn leh da kaba tyngeh.
Halor kane ka juh ka jingjia, u Superintendent of Police West Khasi Hills u la kyrpad ia ki paidbah ban ym pyn saphriang paidbah shuh bad ban weng noh ia ka video kaba la saphriang ha ki rynsan social media, kaba pyni ia ka jingshah shoh katei ka samla kynthei.
Pule ruh : Register case ki Pulit ba shah shoh tohmet ka thei samla ha surok Nongstoin by-pass
U SP u la pyntip ba ki pulit ki la kem ia une u briew uba tip kyrteng u Fastdingson Wanniang, 23 snem ka karta. La pyntip ba u Fastdingson Wanniang u dei u tnga barim jong kane ka kynthei ba shah shoh bad kine ki shi lok ki la ia shong khlad mynta la shi snem shiteng
Ki pulit ki la maham ba ka jingpynsaphriang paidbah ia kum kine ki video ka long pyrshah ia ka ain bad kiba leh ia kane, kin ngat ha ki jingpynshitom katkum ka kyndon jong ka BNS bad Information & Technology Act. La pynkynmaw ruh ba ka jingpynpaw ia ka kyrteng jong ka lanot ka long pyrshah ia ka ain.
La kyrpad ia ki paidbah ba kin ym pynsaphriang paidbah shuh ia kino kino ki jingtip kiba ym pat lah ban pyn thikna, namar kane ka lah ban ktah ia ka lanot bad pynthut ia ka jingtohkit kaba dang iaid. Lada don kino kino kiba don jingtip halor kane ka jingjia, ki lah ban pyntip sha ka Police Control Room ha u number 9366498499 lane phone sha ka 102, ha kaba yn buhrieh ia ka kyrteng jong kiba ai jingtip.
