Nongpoh, Jylliew 03 : San ngut ki briew na kajuh ka longiing kila kem pang kynsan bad shitom jur hadien ka jingbam ia u tit khlaw hynnin ka miet. Kane ka jingjia kala jia ha ka por 8-9 baje mynmiet ha ka shnong Nongkyndang, Saiden, Ri-Bhoi District.
Ia kine ki 5 ngut kiba kem pang la pynkit mar mar sha Nongpoh Civil Hospital bad Bethany Outreach Hospital ban ioh ia ka jingsumar.
Kine ki 5 ngut ki kyrteng I kong Larita Syiemlieh (Kmie), Wanphrangsngi syiemlieh (23), Daniki syiemlieh (16), Larikynti syiemlieh (14) bad Da-u-Rijied Syiemlieh (3).
Kat kum ka jingiathuh kine kiba shitom, baroh na kane ka longiing kila iabam ja da u tit hynnin ka miet sngi U Blei, uba dei u tit khlaw bala wanrah na kawei ka khlaw jong ka shnong Umran.
Ki iathuh ba hadien ba dep bam ia une u tit, iwei hadien iwei kila ioh pang bad sdang prie bad kiew jingshit bad dei ha ka por 10 baje haduh 11 baje ba ka jingpang kala nang jur bad la pynkit noh sha Nongpoh Civil Hospital katba ia kiba la shimtom kham jur la pynkit sha Bethany Hospital.
Lah ban kdew, dang ha ka Sngi U Blei jong ka taiew bala lah, 3 ngut ki khynnah kila iap na ka jingshitom ba ki ioh hadien ka jingbam ia u tit khlaw. Kane ka jingjia kala jia ha ka shnong Saphai, West Jaintia Hills District.
