Nongstoiñ, Naitung 28: Hynne ha ka por 1:30 mynstep kaba la dei 28 tarik, ki pulit ba kyrpang jong ka ANTF, ki la pynlong ka jingkhynra ba thwet ïa kiba donkti, hadien ba ki la tip tikna jong ka jingdon kiba wanrah drok heroiñ sha Nongstoiñ.
Ha ka jingkhynra jong ki ANTF, ki la ïoh ban kem ïa ki lai ngut ki runar na kawei ka maruti alto. Ha ka jingïoh kem bad khynra ki pulit ki la ïoh ban kurup lai tylli ki mobile phone, kumba shiphew gram u drok heroiñ u ba shong dor kumba 30 hajar tyngka eiei. Ïa baroh lai ngut la pynngat ha ka kyndoiñ aiñ NDPS. Nalor nangta ka jingtohkit ban lap shuh shuh sa kiwei kiba donkti ka la ïaid shakhmat.
Lah ban kdew hangne ba watla hapdeng ka jingjur ki nongdie bad nongdih drok, pynban ka ANTF kam shym shongthait ne shong kli kti. Ha ka miet ka iong ki la pyndep ïa la ka kamram ban thwet jur ïa baroh kiba don ha kane ka bynta bad ka thong hi ka long ban ïohkem lut ïa ki briew kiba la kyrni ha ka kam dih bad khaïi drok ha ka thaiñ bad ka District.
Uwei na ki heh pulit ba peit ïa kane ka kynhun ba kyrpang, u bym kwah pynpaw kyrteng ïalade, u la ong ba tang kane ka kynhun na ka tnad pulit kam pat biang. Hynrei, u la ong ba kaba donkam ka long ka jingïai ïatreilang na ki sengbhalang, ki bor shnong, ki seng samla shnong, VDP shnong bad ki seng longkmie.
