Nongpoh, Naitung 28: Ka Dorbar Shnong Umsohma, Lailad lem bad ka Dorbar Shnong Umlyngkdait New Tasku, mynta ka sngi ki la dawa tyngeh na ki bor ka tnat PWD bad ka sorkar jylla ba kan maramot noh mardor ïa ka jingkieng Lailad namar ka jingsynjor kaba lah ban buh jingma ïa ka leit ka wan ki paidbah nongleit nongwan khamtam kito kiba na Western Ri Bhoi District.
Kane ka jingdawa, na ka liang kine ki ar tylli ki dorbar shnong ki la pynmih ka long namar ba kam shem la don kano kano ka dak ka shin ban maramot ïa kane ka jingkieng kaba la kut noh ka por treikam jong ka mynta la katto katne snem, katba ka jingïaid jong ki kali kiba kit palat 9 ton ka dang ïai bteng man ka sngi.
Ha kane ka jingleit jurip ïa katei ka jingkieng la lamkhmat da u Rangbah Shnong ka Umsohma, Lailad, u Bah Shembok Mawphñiang bad u Rangbah Shnong ka Umlyngkdait, New Tasku, u bah Edwin Syngkli bad kiwei kiwei kiba la lap ba kane ka jingkieng ïaid kali ka la nang ïai shong synjor namar ka jingbteng ka jingïaid jong ki kali kiba kit palat 9 ton nangta ka jingïaid jingïeng kaba man ka sngi jong ki kali kit briew bad kit mar kiba ïaid lyngba kane ka jingkieng ha Lailad.
Ki la ïathuh ruh, ba watla ki bor pynïaid district ka Ri Bhoi bad ka tnat PWD ki la dep ban mana ïa ka jingkit palat 9 ton hynrei la sakhi pat ba ym pat lah ban tehlakam ïa kane ka jingkit palat pud kaba la nang pynsynjor bad buh jingma ïa ka leit ka wan ki paidbah, kumta na ka liang kine ki ar dorbar shnong ki la dawa mardor ïa ki bor district ka Ri Bhoi District kumjuh ka tnat PWD ba kin phaikhmat noh mardor halor kane ka jinglong jingman jong katei ka jingkieng khnang ban lait na kino kino ki jingjia kiba sngewsih.
