Hadien 17 snem ioh ki bahaing iaka jingbishar ba hok
Shillong, Naitung 28: Ka Iingkashari Meghalaya High Court, kala hukum ban set along shirta jingim ia ki shikni shipyrsa kiba pyniap ia u samla pule ka St.Anthony’s College ha u snem 2006.
Kine ki shikni shipyrsa ki dei u Bernard Lyngdoh Phawa bad u Bonie Lyngdoh Phawa, kiba pyniap ia u samla pule ba 21 snem Biplap Das uba pule Undergraduate ha ka Mass Communication ha St. Anthony’s College.
Ka Iingkashari Meghalaya High Court kala pynmih ia kane ka hukum haba pyndam noh ia ka hukum jong ka Iingkashari Magistrate kaba pyllait ia kine ki shikni shipyrsa na katei ka jingkynnoh pyniap briew.
Ka Iingkashari Division Bench ba kynthup ia u Chief Justuce Sanjib Banerjee bad Justice Wanlura Diengdoh, kala pynmih ia kane ka hukum ha ka sngi Balang ka 27 tarik Nailur hadien ka jingshem ba kine ki arngut ki donkti ban leh ia katei ka kam bymman.
La hukum ban set along shirta jingim ia ki hapoh ka kyndon 302 IPC ha ryngkat bad laingut ka jingshong along kat kum ka kyndon 210 IPC.
Ka dei ha ka 18 tarik Rymphang 2006, ba u Biplap Das ula jah rngai nala iing bad ki bahaiing kila pyntip sha ki Pulit ha ka step kaba bud haba lum ruh ia ka kynhun ban iawad ia une u samla, kaba lam sha ka jingioh lum ia ki sakhi kynthup ka phone call ba u Biplap ula phone ha ka miet ba u jah rngai.
Kane kala lam sha ka jingkem ia u Bernard Lyngdoh Phawa ha ka 20 tarik Rymphang, 2006 halor ka jingkynnoh ba u rahbor ban dawa pisa hapoh ka kyndon 364 A jong ka Indian Penal Code. Da ka jingtohkit ia u, u Bernard ula phla ia ka jingdonkti u pyrsa Bonie Lyngdoh Phawa ia uba la kem ha ka 23 tarik Rymphang, 2006.
Ki bahaiing kila lapdien ia kane lyngba ka Khun ki Singhania kaba ia ieid paralok bad u Biplap, kaba iathuh ba u Biplap ula phone ia ka ha ka miet 18 tarik na kawei ka PCO. Ki bahaiing kila leit sha kane ka PCO bad lapksai ia ka jingdonkti u Bernard.
Ia ka metiap u Biplap la lap ha ka 21 tarik Rymphang da ka jingialam lynti u Bernard bad ia ka post mortem la leh ha ka 22 tarik Rymphang, kaba pynthikna ba u Biplap ula shah pyniap da kaba shah ksih bad ka sngi ba u shah pyniapka dei ha ka 20 tarik Rymphang.
Watla ki Pulit kila pyrshang katba lah, ka Iingkashari kala pyllait ia u Bernard bad u Bonie ha ka 26 tarik Lber, 2006 namar ka jingbym biang ki sakhi satar ban pynthikna ia ka jingdonkti jong ki.
Hynrei, ka Iingkashari High Court ha ka hukum, kala banjur ia ka jingshyrkhei kane ka kam bymman bad ia ka jingthmu jong kine ki shikni shipyrsa, kaba lam sha ka jingpynngat ha ka jingpynsajia.
Ka Ingkashari kala hukum ruh ba dei ban kem noh mardor ia kine ki arngut bad ban sdang noh ka jingset along ia ki.
