Shillong Nailur 27 : Ha ka jingialehkai ka ban sah jingkynmaw, u Shanborlang Marbaniang bad u Iarapborsing Kharbani kila ioh ia ka nam jop haka sngi sdang jong ka Pro Boxing Fight Night kaba la pynlong da ka Om Ayurveda Boxing Promotions ha Gujarat.
Na ki 3 ngut ki nongiakura kiba mihkhmat iaka Meghalaya kiba kynthup ia u Shanborlang Marbaniang (23), Iarapborsing Kharbani (18) bad Elvin Rani (21) – kila leit sha Gujarat ban iashimbynta haka jingiakob kura, hynrei u Shanborlang Marbaniang bad u Iarapborsing Kharbani, kiba na Upper Shillong, kila jop katba u Elvin ula mad ia ka jingrem.
U Shanborlang Marbaniang, u nongiakura u bym pat rem, ula khring ia ki nongpeitkai namar ka jingsted bad jingkhlain ka jong u ha kaban kura bad ula pynrem ia u Madan Pratap jong ka Andhra Pradesh ha ka kyrdan Flyweight da ka Technical Knockout.
Katba u Iarapborsing Kharbani, uba iakhun ha ka Bantamweight ula pynrem ia u Devavath Anil Kumar jong ka Telangana, hynrei u Elvin Rani, uba iakhun ha ka Featherweight ula iakhun pyrshah ia u nongiakura uba khlain u Saleem Khan jongka Jammu and Kashmir.
Baroh 3 ngut kitei ki nongiakura kiba mihkhmat iaka jylla hapoh jongka Meghalaya Professional Boxing Council (MPBC) bad kine mynta kin pynkhreh ban shah pdiang burom haba ki wanphai sha ka jylla ha ka sngi Palei.
