Nongpoh, Nailar 27: Ka Western Ri Bhoi Dorbar and Social Welfare Organization hadien ba la kut noh ka samoi treikam jong ki nongialam barim, ka la lah ban pynthymmai ia la ki nongkitkam kiba thymmai ha ka 26 tarik Nailar ha ka shnong Patharkhmah.
Ka Western Ri Bhoi Dorbar ka kdup kumba 107 tylli ki shnong hynrei ha kane ka ileksion ban jied ia ki nongialam ba thymmai, la wan shim bynta da ki riew rangbah na ki 57 tylli ki shnong.
Ha kane ka ileksion ha ka post President u Bah Eniasroy Rani na ka shnong Umsong u la pynliem ia u Bah Najim Kharmalki na Patharkhmah u ba dei ruh u President barim ka Western Ri Bhoi Dorbar bad ia ka post General Secretary la ioh da u Bah Langishkar Wahlang na ka shnong New Jirang.
La jied ruh ia arngut ki Vice President kiba kynthup ia u Bah Centre Doloi na Sohkyrbam Domblang bad u Bah Petelman Thangkhiew na Patharkhmah, Assistant Secretary la jied ia u Bah Ambrose Doloi na ka shnong Jereibasai, Bah Ripolas Nongtri Treasurer bad arngut ki Adviser ba kynthup ia u Bah Esman Lyngdoh bad u Bah Najim Kharmalki.
Haba pyntip sha ki Lad Pathai Khubor, u Bah Eniasroy Rani bad u Bah Langishkar Wahlang kum ki nongialam ba thymmai jong ka Western Ri Bhoi Dorbar, ki la pynpaw ia ka jingkmen ban shah jied kum ki nongialam ba hakhmat jong kane ka kynhun kaba peit bad khmih ia ki palat spah tylli ki shnong bad angnud ruh ba da ka jingiatreilang jong baroh ki nongshong shnong, kin lah ban ai ka jingshakri kaba janai ia kane ka thain Ri Bhoi Sepngi.
Ki la pynpaw ruh, ba kum ka thain hi kaba dang donkam shibun ki jingkylla ha ka liang ka roi ka par, kumta kum ki nongialam ba la shimti ia ka lyngkor, ki la pynpaw ba kin nang trei halor kiba bun ki mat ban wanrah ia ki jingkylla ha ka thain.
Pule ruh: Iap u rangbah briew ba syllad ka kali ha Lad Umpih
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
