Shillong, Nailar 14 : U ‘Junior Martinez’ na Mawryngkneng ula im ia ka jingphohsniew jong kiba bun ki rang ialehkai phutbol ym tang jong ka Jylla Meghalaya hynrei ha ka Ri India baroh kawei, ban long u khlur ialehkai shisien ka sngi.
Une u ‘Junior Martinez’ u dei u heprit Samborlang Rynjah ba dang 7 snem ka rta, uba la iakren iakhana ha kylleng ki Ri ka pyrthei bad jop ia ka jingieid jong kiba bun ki riew ieid phutbol namar ka sap apkol kaba iasyriem thik kum ka sap jong u khlur apkol ka Argentina u Emiliano Martinez.
Ka jingsaphriang ka video apkol jong u ha ki rynsan social media, kala pyniap biej ia kawei ka Academy ba pawnam bha ka Ri India-ka Minerva Football Academy ba na Punjab, kaba la shimti mynta ban ai jinghikai pyntbit ia une u Heprit ka Jylla Meghalaya haduh 10 snem ha ka Academy.
U heprit Samborlang un leit pyniasoh bad ka Minerva Football Academy ha ka sngi Balang ban wan ban sdang ia ka lynnong ba thymmai ha ka jingim jong u. Ka jingkylli ka mih mynta ha ka jingmut jingpyrkhat jong kiba bun ba hato une u Khynnah 7 snem un tyngshain kum uwei na ki nongap kol ba tbit eh ka India, bad wanrah ia ka nam ka burom ym tang ia ka Meghalaya hynrei ia ka Ri baroh kawei.
Baroh kala sdang haba u Kni jong u Samborlang ula ring kai ia ka video katba u Samborlang u dang ialehkai bad la ki jong ki paralok ha phyllaw iing. Khlem da poi pyrkhat, kane ka jingring kai ia ka video kan pynlong ia u Samborlang kum u heprit ba khring eh ha ka kor Internet.
Ka sap jong u, kala khring ia ki club bapher bapher ka Indian Super Leaque (ISL) hynrei kaei kaba nang rah ia ka nam jong u ka long hadien ba u Emiliano Martinez, u nongap kol ka Argentina uba ioh ia ka Golden Gloves ha ka World-cup 2022, ula pynphriang ia ka video jong u Samborlang sha ki nongbud jong u, kiba don haduh 14.6 million ngut.
Na ka phyllaw khyndew ha kyrpong iing sha ka jingioh jingithuh da u nongap kol ba jop ia ka World-Cup, ka jingiaid lynti jong u Samborlang kala iasyriem thik kum ka phlim ba ioh award.
Hadien ka jingpynphriang u Emiliano Martinez ia ka video ha ki social media, ka kyrteng u Samborlang kala rung ha manla ki thliew iing. Ki lad pathai khubor, ki YouTubers, ki club phutbol, ki riew sainpyrthei bad ki riew ieid phutbol kila leit ban iakynduh ia une u heprit.
Kila don ruh ki club ba pawnam ha Saudi Arabia bad ha Sweden, kiba la pynpaw ia ka jingthrang ban shimti ha kaban ai saindur ia ka lawei u Samborlang hynrei hadien ka jingiasyllok kaba janai bha, ki bahaiing hasem jong une u heprit kila shim rai ban iasoi soskular bad ka Minerva Football Academy ha Punjab.
