Shimkhia u Myntri Sorkar ban tynruh ia ka Sorkar halor ka jingsniew ki surok ha Ri-lum Garo

0
64

Shillong, Risaw 09: U Mynri sorkar Rakkam A Sangma u badei ruh u MLA ka Rongara Siju constituency hynne ka sngi ula pyntip ba shen un sa shong jingialang bad u Symbud Myntri Rangbah ba khmih ia ka tnad PWD (Roads) lem bad ki deputy commissioner (DC) ka thain Garo Hills ban iakren halor ki sienjam ban pynbha iaki surok hapoh ka thain.

Haba kren sha ki lad pathai khubor u Rakkam ula ong ba ki surok hapoh ka Ri-lum Garo naduh Baghmara, Nogaon shaduh Dalu khamtam ki surokbah National Highway kila sdang jot, kaba la wanrah ka jingeh iaki paidbah ka thain.

U Rakkam ula iathuh ba naka liang ka tnat Ministry of Road Transport and Highways ka sorkar pdeng kala myjur iaka jingtyrwa ka sorkar Meghalaya ban kyntiew ia kine ki surok shaki National Highway namar kidei ruh ki surok kiba pyndonkam da kiwei pat ki nongshongshnong ki jylla ka thain shathei lammihngi (North East).

“Ka jingeh ban kyntiew iaki surok sha ki National Highway kadei hi namar ka jingeh ban ioh jaka hynrei naka liang ka sorkar kala shim khia bad dang shen nga la lum iaka jingialang ha Baghmara bad nga la ioh jingtip ba shen yn sa ioh noh iaki jaka ban pynheh iaki surok hapoh ka Ri-lum Garo” la ong u Rakkam.

Haba iadei bad ka jingpynbha iaki surok bala jot, u Rakkam ula ong “Naka liang ka tnat Ministry of Road Transport and Highways ka sorkar pdeng kala mynjur ban iarap T.6 klur ban pynbha iaki surok ha Ri-lum Garo hynrei nga sngew ba kane ka mang tyngka ka dang rit palat ban pynbha lut iaki surok hapoh ka thain”.

Halor kane u Rakkam ula ong ba shen un sa kynduh ia u Symbud Myntri Rangbah ban iakren ha kaban pyrshang pynioh kham bun ka jingiarap haka liang ka pisa ban lah pynbha noh iaki surok bala jot.