Shillong, Nohprah 16: U Myntri ka tnad Tourism Timothy D Shira u la pynbna ia ki lad ki lynti bad ki sienjam baka tnat kan shim naka bynta ban kyntiew ia ka kam jngohkai pyrthei kaba lait naka jingpyndonkam ia ka plastic hapoh ka jylla.
“Ngi la dep ban shim khia ha baroh ki jaka jngohkai pyrthei, ngi la buh ia ki jaka bret nuit (dustbin) khnang ba ïa baroh ki jaboh yn lum bad bret bha hakine ki jaka bret niut” ong u Timothy.
U Timothy u la ong ba ia ki jaka bret nuit (dustbin) yn buh ha ki jaka ba biang ban pynshlur ia ki nongjngohkai pyrthei bad iaki paidbah ban bret iaki nuit khamtam ia ki plastic daka jingkitkhlieh.
“Ïa ki jaka bret (dustbin) yn buh ha kata ka rukom ba ki briew kin ym donkam ban rah iaki nuit sha ki jaka kiba jngai” u la bynrap.
U Myntri u la ong ba kane kadei ka jingthmu ka long shi bynta jong ka jingpyrshang kaba kham heh ban pynlong ia ki jaka jngohkai pyrthei jong ka Meghalaya kiba lait na ki plastic, bad ka Sorkar ka dang trei ban pyntreikam ia katei ka jingthmu ha baroh kawei ka Jylla.
“Kam dei tang ka kamram jong ka Sorkar, hynrei ka dei ruh ka kamram jong ki paidbah ban pyntreikam ia ka” u la ong.
U la ban jur ia ka jingdonkam ban pynsngewthuh paidbah ha kaba pynneh ia ka mariang kaba khuid, da kaba ong, “Ki briew ki donkam ban tip kumno ban bret ia ki jaboh, khamtam ia ki plastic, ban pynlong ia baroh ki jaka kiba lait na ki plastic”.
