Nongstoiñ, Ïaiong 29: Ka shnong Khyllemsangrin West Khasi Hills ha ka sngi nyngkong, kala leit ban buh da ki ruh hapoh ka khlaw shnong, ban pynkharoi ïa ki sim kiba la jan duh jait kum ki Moina, Saro bad kiwei kiwei ki jait sim, da ka jingïatreilang ki paitbah nongshong shnong.
Ka Shnong kala shim ia kane ka sienjam lyngba ka Forest & Environment Committee, ha ka jingïalam u Bah B.S.Syiemlieh, Sordar u ba long ruh u Shongknor ka tnad Forest & Environment Committee bad u Bah N.D.Khardewsaw u ba dei u Secretary ka Forest & Environment Committee bad kiwei kiwei.
Ha kane ka sngi na ka lang ka Shnong Khyllemsangrin, ka la pynbna ïar ba ym shah shuh ban siat ne ban pynïap ïa baroh ki jait sim na kane ka khlaw, kynthup ïa ki syiar khlaw, ki ‘yiar khiar bad ki mrad ruh.
“Lada lap kino kino kiba ïaleh pyrshah kin shah pynshitom katkum ki kyndon ba ka shnong ka la buh. Kumjuh ruh la khang pyrshah ban leit shim ïa ki sim khun na kine ki ruh, kiba ka shnong ka la leit ban buh” kala ong.
U Sordar u la pynpaw ba kane ka dei ka jingpyrshang ban bud ïa ka jingleh ki longshuwa manshuwa kiba la hikai ba “haba shim da tip ruh kumno ban siew kylliang da kaba bha”.
U la ong ruh ba kane ka dei ka sien jam ba ka dorbar ka rai ban leh kum shi bynta ban pynneh pynsah ïa ki sim ki doh, ki mrad ki mreng ha ka thaiñ baroh kawei.
U la kyntu ruh ïa ka jingïatreilang jong baroh khamtam ki para thaiñ para nongshong shnong, ban shimkhia bad ban aiti khnang ba kane kan long ka nuksa sha kiwei pat, ba kin nang kumno ban ri ban sumar bad pynim ïa kaei kaba u Blei u la ai ha ki bynriew baroh.
