Shillong, Jylliew 24 : U Myntri Rangbah ka Jylla Conrad K Sangma ula shim ia ka jingai kyrdan ba dang shen ha ka Performance Grading Index (PGI) kum ka lynti kaba biang bha haba pynpaw ba kane kan nang ai mynsiem ia ka Jylla ba kan trei shitom shuh shuh ha kaban pynjanai ia ka kam pule puthi.
Wat hapdeng ka jingwan ka Jylla sha trai bha ha ka kyrdan, u Conrad ula pynpaw ia ka jingsngewskhem ba ki jingpynkylla bad ki prokram bala pyntreikam mynta kin sa sei ia u soh uba bha ha ki sngi ban wan.
U Conrad ula kubur ba ka kam pule puthi ka dei kaba bun jyrwit jyrwat bha, ha kaba ka jingktah jong kano kano ka rai ba shim, ka shimpor ba kan paw pyrthei.
“Ka kam pule puthi ka dei ka kam kaba jyrwit jyrwat bha bad kano kano ka kam ne ka rai ba ngi shim, ka jingktah jong kine ki rai ba kin treikam lane iohi ia u soh, kan shimpor da ki snem ba kin paw ym da ki bnai” ula ong.
U Myntri Rangbah ula kren halor ki jingpynwandur thymmai bad ki prokram bala pyntrei ha ka kam pule puthi kum ka jingpyndonkam ia ki kot CBSE ia ki katto katne ki sobjek bad kiwei kiwei.
U Conrad ula kular ba ka Jylla kan ym shong kli kti hynrei kan iai bteng ban trei shitom ha kaban pynjanai ia ka kam pule puthi.
“Kane ka dei ka jingtynjuh kaba khraw ia ngi bad nga kular ia phi ba da ka jingwan kum kine ki jingtip, kan pynlong ia ngi ban kwah trei kham bha shuh shuh bad ngin iai bteng ban trei shitom bad pynthikna ba kane kan sa kylla da khongpong” ula ong.
U Conrad ula pynpaw ia ka jingsngewskhem ba da ka jingdon ka kynhun kaba khmih ia ki kam ban wanrah ia ki jingkylla ha ka pule puthi, ka Jylla kan sa iohi ia ka jingioh kyrdan ba kham bha ha ka PGI.
 kum ka lynti kaba biang bha haba pynpaw ba kane kan nang ai mynsiem ia ka Jylla ba kan trei shitom shuh shuh ha kaban pynjanai ia ka kam pule puthi.){kind=link}