Shillong Jylliew 24: U Myntri Rangbah ka jylla u Conrad K Sangma ha ka sngi Ba-ar, ula kyntu ia ki seng saiñ pyrthei kiba don ha Liang Pyrshah ba kin pyrkhat biang halor ka rai ba kila shim bad ban iashimbynta ha ka jingialang jongka All Party Committee ban iakren ia ka mat halor ka jingthmu ban pyntreikam ia ka Railway Project hapoh ka rilum Khasi bad Jaintia.
Haba iakren bad ki nongthoh khubor u Conrad Sangma ula ong, ba ka jingshim rai dang shen jong ki seng kiba don ha ka Liang Pyrshah (VPP bad Congress) ban ym iashimbynta ha ka jingialang kala phah ia ka kyrwoh kaba bakla ha ka kam synshar paidbah.
“Ngi lah ioh ia ki jingpynsngew kiba long pyrshah na ki katto katne ki seng saiñ pyrthei, kumta ngim shym la pyniaid sted shuh ia ka kam. Ka mat ka jong nga ka long, lada phi mynjur ne phim mynjur ruh hynrei ngi dei ban ia shong bad ailem ia ki jingmut jingpyrkhat bad ia ki jingai jingmut ha ka miej” ula ong.
U Myntri Rangbah ula banjur ia ka jingkongsan ban don ia ka jingiakren bad ka lynti ha ka kam synshar paidbah ha kaban wad ia ka lynti ban iaid shakhmat.
“Khlem da don ia ka lynti kaba iaid katkum ka kam synshar paidbah ha kaba iadei bad kane ka kam baroh kawei, katto katne ki seng saiñ pyrthei kila dep ban rai ba kin ym iashimbynta ha kane, ia kaba nga sngew ba ha ka kam synshar paidbah kane ka long ka kyrwoh kaba bakla bha” ula ong.
U Conrad Sangma ula kyntu ia ki seng ha ka Liang Pyrshah ban pyrkhat biang ia ka rai kaba kila shim bad ban iashimbynta ha katei ka jingialang.
“Nga don jingkyrmen ba ki seng saiñ pyrthei kin pyrkhat biang ia ka rai kaba kila shim bad ngin sa pynbeit pat ia ka tarik. Lada katei kam lah ban jia, kumta shen ngin sa hap ban pynbeit noh ia ka tarik” ula ong.
U Myntri Ragbah ula ong, ba ka long kaba donkam ban iaid da ka lynti kaba donbynta lang da baroh ha kaban shimkhia ia ki jingeh bad ia ki jingsngewkhia kiba iadei bad ka jingthmu ban sdang ia ka lynti rel ha ka thain.
