Agartala, Naitung 08: U Myntri Rangbah (CM) ka Tripura, u Manik Saha hynne ka sngi Thohdieng u la shim smai kum u dkhot ka iingdorbar assembly ka Tripura.
U Saha u la shah jied sha ka assembly ka jylla hadien ka ilekshon shiteng samoi ka ba la long ha ka 23 tarik u jylliew ba la dep. Ia ka jingpyntian smai na ka bynta u Saha la pyndep da u Lamphang ka assembly ka Tripura u Ratan Chakraborty. U Saha u la iehnoh kam kum u dkhot ka Rajya Sabha ha kane ka sngi Nyngkong ba la lah.
“Nga la shim smai kum u dkhot ka Tripura Legislative Assembly mynta ka sngi. Da ka jingiarap ki para dkhot hapoh ka dorbar bad hapoh ka jingialam jong u Myntri Rangbahduh (PM) Narendra Modi kum u nongialam ngin lah ban pyniaid shakhmat ia ki kam pynroi ha ka jylla,” pynpaw u Saha lyngba ka twitter.
Haba iakhun ia kane ka ilekshon ba la dep ha ka sien ka ba nyngkong ha ki laiphew tylli ki snem jong ki kam sain hima jong u, u Saha 69 snem rta u ba dei u heh Congress u ba la kylla long u nongialam ka BJP u la jop ha kane ka ilekshon shiteng samoi na Town Bordowali Assembly constituency.
U Saha u ba dei ruh u hehduh ka seng BJP ha ka jylla, u la shim smai kum u Myntri Rangbah ka jylla ha ka 15 tarik u Jymmang ba la dep, kata shi sngi hadien ba u Biplap Kumar Deb u la iehnoh na kane ka kam ba hakhliehduh ka jylla.
Ban pyndep pura ia ki jingdonkam ki ba katkum ki riti synshar khadar jong ka ri, u Saha u dei ban long u dkhot jong ka assembly hapoh ka hynriew bnai kynthih.
Ha kane ka ilekshon shiteng samoi ka ba dang shu dep shen ka sorkar synshar BJP ka la jop lai na ki sawtylli ki seat, ka ba kynthup na ka jaka ka ba u Manik Sarkar u la pynrem ia u kyrtong ka Congress u Asish Kumar Saha da haduh 6,104 vote.
Kiwei pat ki dkhot ki ba la shah jied ki kynthup ia u Sudip Roy Barman (Congress) bad ka Malina Debnath bad ka Swapna Das (Paul), na ka BJP ki ba la shim smai kum ki dkhot ka Tripura assembly ha ka 28 tarik u Jylliew ba la dep.
