Shillong, Jylliew 27 : U Deputy Inspector General of Police (Eastern Range) Davis NR Marak, ha ka sngi Palei ula ong ba ka Tnad Pulit ka Jylla kala shim ia ki sienjam ban pynkhlain janai ia ki bor pahara ha Iingkashari Meghalaya High Court bad kiwei ki jingtei ba kongsan jong ka Sorkar ha Jylla.
Ha ka 18 tarik Jylliew, ka Iingkashari Meghalaya High Court kala ioh pdiang biang ia ka email ba byrngem ban pynbthei bomb. Ka jingbyrngem ba nyngkong eh kala wan ha ka 6 tarik Kyllalyngkot mynta hi u snem.
Haba iakren bad ki nongthoh khubor, u Marak ula ong “Ngi la phah ia ki kynhun bomb squad jong ngi ban pynshisha. Hynrei, ka paw ba kane ka jingpynbthei bomb ka dei kaba shu thok. Kumta, ym shym la don satia ka jingujor ejahar”.
“Hynrei watla katta, ngi la shimkhia bha halor ka jingshngain jong ka Iingkashari bad kiwei ki jingtei ba kongsan. Ha ka jingshisha, ngi lah dep iakren ruh la katto katne sien haba iadei bad ka jingpahara ia ki jingtei ba kongsan bad ngi la shimkhia bha ia kane ka bynta” ula ong.
Ula pyntip ba ka kam ba iadei bad ka jingshngain bad jingpahara kan dei kawei na ki mat ba kongsan bha, ka ban iakren ha ka SsP-Cos Conference ka ban sdang lashai ka sngi ha Police Headquarter.
