Shillong, Nailar 12: Da ka jinglong ki jaka ka nongbah Shillong kaba bun ki jaka lum bad pynsyllang bha ha kaba niah ia ki sikil ba shu iuh ia ki pedal da ki kjat, ka Sorkar Jylla mynta kala pynshlur ia ki nongshongshnong ban niah noh da ki sikil elektrik ka ban pynduna ia ka jingdheng kali bad pynshlur ruh ia ka rukom im kaba koit ba khiah.
Ka Meghalaya kala shim ia ka sienjam ban pynneh ia ka jingkhuid bad ka leit ka wan kaba koit ba khiah lyngba ka jingsdang ia ka Ride Shillong, ka leit ka wan kaba nyngkong eh da kaba shim wai ia ki sikil elektrik.
U Myntri Rangbah ka jylla Conrad K. Sangma ryngjat bad u aktor bad u nongpynsaphriang ia ka koit ka khiah u Milind Soman, kila kaweh lama ia kane ka sienjam ba thymmai ha Jylla ban pynduna ia ka jingdheng kali, ban pynduna ia ka jingpynmih ia ka Carbon bad ban pynshlur ia ka rukom im kaba biang.
Ia kane ka sienjam la shim da ka Sorkar Meghalaya da ka jingiohi jngai na ka bynta ki paidbah kiba iaidkjat bad ki nongniah sikil, kaba la pyntreikam da ka jingkyrshan jong ka Ministry of Housing and Urban Affairs, GIZ (India-Germany cooperation), Meghalaya Tourism bad ka Green Urban Mobility Partnership.
Haba ai jingkren u Conrad K. Sangma ula pynpaw ia ka jingsngewsarong ha kaban plie ia kane ka projek kaban wanrah ia ka jingbym noh shilliang hapdeng ka jingpynneh pynsah ia ka mariang bad ka leit ka wan katkum kane ka juk kaba mynta.
“Mynta ka sngi ka long palat ban ia ka jingplie ia ka leit ka wan kaba thymmai hynrei kadei ka jingsdang jong ka jingkynriah ha ka rukom kaba iadei bad ka leit ka wan” ula ong haba bynrap “Ka jinglong jingman ki jaka ha Shillong kadei kaba buh ha ka jingeh ban niah ia ki sikil tynrai hynrei da ki sikil elektrik yn lah ban weng noh ia katei ka jingeh. Kane ym tang ba kan pynshlur shuh shuh ia ki briew ban niah ia ki sikil hynrei ruh kan pynduna ia ka jingpynmih ia ka Carbon bad ban pynsuk ia ka leit ka wan ha ka nongbah.
Katba u Milind Suman ula iaroh ia ka sienjam kaban ai mynsiem ban ioh ia ka jingim kaba koit ba khiah.
“Ka jingniah sikil kam dei kaba bha tang ia kane ka pyrthei ba ngi im hynrei ka jingkylla na ka bynta ka koit ka khiah. Ka Shillong kala pyni ia ka nuksa ia ka ri India baroh kawei kumno ban ialam da ka nuksa” ula ong.
Katba u Commissioner & Secretary ka Urban Affairs u Dr. Vijay Kumar ula ong ba ka jingpyrshang ban pynwandur ia ki surok, ban pyniar ia ki lynti iaidkjat bad ban tei ia ki jala ban niah ia ki sikil.
U Milind Soman ula iaroh ia kane ka sienjam da kaba ong, “Kadei ka model ne ka nuksa ia ka ri India baroh kawei” ban kyntiew ia ka koit ka khiah bad ka jingpynneh pynsah.
Ha kane ka jingplie paidbah la pynlong iaka cycle rally na Elephant Falls sha Mawphlang, ka Cycling Heritage Rally hapoh ka nongbah bad ka jingwan iashimbynta ki heh ophisar sorkar, ki riewieid niah sikil bad ki paralok na kiwei pat ki ri.
