Shillong, Nailar 12: Ka Pyndengumiong Presbyterian Secondary Secondary School, Mairang, ha ka sngi ba-ar, kala rakhe ia ka jubili rupa kaba la pynshongkun da ka jingiadonlang u Myntri Rangbah ka jylla u Conrad K Sangma.
Ha kane ka sngi la ia don lang ruh u Myntri ka tnat CRD u Abu Taher Mondal, u Chairman ka State Planning Board Bah Metbah Lyngdoh bad kiwei ki riew rangbah bad kiba shah khot sngewbha.
La seng ia ka skul ha u snem 2001 tang lai ngut ki khynnah skul, hynrei kane ka skul ka la kiew ha ka jingdon ki khynnah skul haduh palat 500 ngut.
Haba ai khublei ïa ka skul kaba la ai ka jingshakri kaba 25 snem, u Myntri Rangbah ka Jylla u la ïaroh ïa ka jingaiti jong ka ha ka jinghikai ha ka liang ka jingpule lyngba ka motto “Mold and Shape the Child in God’s Image.
U Myntri Rangbah ka Jylla u la pynshlur ia ki samla pule ban buh ia ki thong, ban trei shitom, bad ban pyn neh ha ki jinglong babha.
U la kubur ruh ia ki jingeh kiba ka tnat pule puthi ka iakynduh, khamtam ha kaba kyrshan ia ki skul deficit bad ki skul ad-hoc.
U Myntri Rangbah ula pynbna ïa ka jingïarap pisa kaba T.15 lak na ka Chief Minister’s Special Development Fund na ka bynta ban pynheh ïa ka ïing skul bad T.3 lak na ka bynta ka jingrakhe Silver Jubilee ha ryngkat ka jingkyrshan ban pynbiang ïa ki tiar tem ïa ka skul.
Naka liang u Bah Metbah Lyngdoh haka jingkren u la ïaroh ïa ki jingjop jong ka skul bad ai khublei ïa u Myntri Rangbah ka Jylla na ka bynta ka jingkyrshan ba bteng jong u, da kaba kular ban ïasaid na ka bynta ki jingdonkam jong ka skul.
Ka jingrakhe Silver Jubilee ka la long daka jingsdang jong ka prokram kaba shisnem ban burom ïa ka pateng jong ka skul bad ban pynkhlain ïa ka thong jong ka ban long ka jingnang jingstad bad ka jinghikai da kaba pynshong nongrim.
