Shillong, Rymphang 6: Ka Mawlai SC kala iakhaid da 1-1 bad ka Langsning FC ha ka jingiakhun ha ka OC Blue Shillong Premier League 2024, katba ka Rangdajied United kala pynrem da 2-0 ia ka Sawmer ha ka jingiakhun kaba la long hynne ka sngi Palei ha SSA Stadium, First Ground, Polo.
Mar ia sdang ka kylla step u Damanbhalang Chyne ula thep ia ka kol na ka bynta ka Mawlai ha ka minit kaba 9 hynrei ha ka minit kaba 27 u Dauruhipaia Pale ula thep ia ka kol na ka bynta ka Langsning kaba la pyniakhaid ia kane ka jingiakhun.
Ha ka jingiakhun ka baar hapdeng ka Rangdajied United pyrshah ia ka Sawmer, u Owanijuh Pajuh ula thep ar kol ha ka minit kaba 67 bad 82 ban pynthikna ia ka RUFC ba kan khur ia ka jingjop.
Lada ka Mawlai kala khur ia ka jingjop hynne ka sngi ka lah dei ban tam da 5 point ia ka Shillong Lajong FC hynrei mynta kala tam da 3 point bad kala kamai baroh 29 point bad bteng ruh ban bat ia ka kyrdan kaba nyngkong ha kane ka lympung iakob ialehkai football.
Ka Langsning, kala bteng ban ialehaki bha bad kam shym la mad ia kajingshah rem ha kine ki 5 tylli ki jingiakhun kiba la dep bad mynta kala don ha ka kyrdan kaba 4.
Ka Langsning kala ialehkai bha pyrshah ia ka Mawlai bad kala ioh bun tylli ki kabu lyngba u Roikhihbha Nongtdu bad u Dauruhipaia hynrei kim shym la lah ban thep ia ki kol.
Ha ka jingiakhun ha ka kylla miet kala long kaba itynnad ha kaba kine ki ar kynhun kila ioh biang ia ki kabu tangba kim shym la lah satia ban thep kol ban ioh ban khur ia ka jingjop bad kumta ka jingiakhun kala kut noh ha ka jingiakhaid.
Ka jingiakhun ka Rangdajied pyrshah ia ka Sawmer kala kut da ka jingiakhaid ha ka kylla step hynrei ynda la poi ka kylla miet ka Rangdajied kala pynkylla ia ka rukom ialehaki ka jongka bad Owanijuh Pajuh ula thep ar kol kaba la pynduh mynsiem syndon ia ki rangialehkai ka Sawmer ban lah ban pyniakhaid ne ban ioh ia ka jingjop.
Ka jingiakhun ia ka OC Blue Shillong Premier League 2024 kan long ha ka Sngi Nyngkong ha ka por 11 baje mynstep ha kaba ka Laitkor SC kan iakhun pyrshah ia ka Shillong Lajong bad ha ka por 2:30 mynsngi ka jingiakhun kan long hapdeng ka Ryntih FC pyrshah ia ka Nongthymmai.
