Shillong, Rymphang 26: Ka Sawmer SC kala pynkut ia ka jingiakhun ia ka OC Blue Shillong Premier League 2024 da ka jingjop, ha kaba kala pynrem da 6-0 ia ka Ryntih FC ha ka jingiakhun kaba la long hynne ka sngi Balang ha SSA Stadium, First Ground, Polo.
Ki nongialehkai ka Sawmer kiba la ioh thep kol ki kynthup ia u Bickyson Kharkongor uba la thep ia ka kol ha ka 49 bad 64 minit, u Aibanraplang Dohling ha ka 52 minit, u Rheadolf Nongneng Daloi ula thep kol ha ka 72 minit, u Orestar Sad ula thep ha ka 78 minit bad u Mebanjop Warjri ula thep kol ha ka 89 minit bad ia kine ki kol baroh la thep ha ka kylla miet.
Kane ka jingjop kala pynthikna ba ka Sawmer ka don ha ka jingshngain ban neh beit ha ka SPL kaba mut ruh ba ka Nongthymmai SC bad ka Ryntih kiba dang sah sa artylli ki jingiakhun, kan hap noh sha ka First Division kaban long ha ka samoi ban wan.
Kane ka jingjop kala pynlong ia ka Sawmer ban kiew sha ka kyrdan kaba 7 bad kumba long mynta kala iakhaid bad ka Nongrim Hills SC kaba la ioh lang mar 18 point, hynrei ka Nongrim Hills ka dang sah sa artylli ki jingiakhun ban ialehkai.
Ka jingiakhun hapdeng ka Sawmer bad ka Ryntih ha ka kylla step kam shym la long than kaba itynnad hynrei mar ia sdang ka jingiakhun ha ka kylla miet, ka Sawmer kala ioh ban thep kol bad nangne shakhmat kala iai bteng beit ban thep kol kaba la pynjem khnap syndon ia ki nongialehkai ka Ryntih.
Ka Sawmer kala pynkut ia ka jingialehkai da kaba jop 5 sien, ia khaid 3 sien bad rem 10 sien.
Ha ka sngi Palei ka jingiakhun kan long hapdeng ka Nongrim Hills pyrshah ia ka Nangkiew Irat SC ha ka por 3 baje mynsngi.
