Shillong, Kyllalyngkot 23: Hadien jong ka jingmad iaka jingrem arsien, hynne ka sngi Palei ka Laitkor SC kala khur ia ka jingjop da kaba pynrem ia ka Nongthymmai SC da 4-0 ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo.
Ia kitei ki 4 kol la thep da u Rikmenlang Nongrum ha ka minit kaba 3, u Risuk Malngiang ha ka 24 minit, u Sandy Kharkongor ha ka 37 minit bad ha ka kylla miet u Fridison Wanniang ula thep ia ka kol ha ka minit kaba 62.
Ha ka jingiakhun ha ka sien kaba nyngkong hapdeng kine ki ar tylli ki kynhun ha ka 4 tarik u Naiwieng, ka Nongthymmai kala pynrem ia ka Laitkor da 3-1.
Ka jingjop jong ka Laitkor kala pynlong ia ka mynta ban kamai 13 point bad kala don ha ka kyrdan kaba 6 katba ka Nongthymmai kala neh hi ha ka kyrdan kaba 9 da kaba ioh tang 7 point.
Mar ia sdang ka kylla step ka Laitkor kala ioh thep ia ka kol ha ka minit kaba 3 lyngba u Rikmenlang hadien 10 minit jong kane ka jingshah thep kol, ka Nongthymmai kala ioh ia ka kabu kaba biang bha ban thep ia ka kol hynrei ki nongialehkai kiba shadien jong ka Laitkor kila ioh ban kynjat noh mardor iaka bol hashwa ba kan ioh rung shapoh kol.
U Risuk ula thep ia ka kol baar da kaba shut iaka free-kick, ha kaba ka bol kala leit dei ia u dieng kol hynrei u nongap kol ka Nongthymmai u Banshngainlang Masynting, da ka jingthmu ban iada ia katei ka bol ban rung shapoh kol, kala leit dei pynban ia ka khlieh ka jongu bad kala rung noh shapoh kol, hadien kane la pynmih bujli noh da u Akash Thapa ban ap kol.
Hashwa ban kut ka kylla step, u Sandy uba la mareh na jngai ula ioh ban iakhun para marwei bad u Akash hynrei u Sandy ula ioh ban shut ia katei ka bol bad baroh ki nongpeitkai kila hsu khmieh ia la ki khmat ban iohi ba katei ka bol kala leit rung shapoh kol.
Ha ka kylla miet, u Fridison ula ioh thep ia ka kol ha kaba u Akash ym shym la lah ban iada shuh ia katei ka bol kaba la leit brung shapoh kol.
Ha ka sngi Thohdieng ka jingiakhun ha ka por 11 baje mynstep ka n long hapdeng ka Shillong Lajong pyrshah ia ka Sawmer SC bad ha ka por 2:30 mynsngi ka jingiakhun kan long hapdeng ka Mawlai pyrshah ia ka Ryntih FC.
