Shillong, Mar 3: Ka Nangkiew Irat SC kala kiew na ka kyrdan kaba 6 sha ka kyrdan kaba 4 ha ka OC Blue Shillong Premier League 2024 da kaba pynrem ia ka Ryntih FC da 6-0 hynne ka sngi Nyngkong ha ka jingiakhun kaba la long ha SSA Stadium, First Ground, Polo.
Ia kitei ki 6 kol la thep da u Damehun Syih ha ka 58 minit, katba u Shaibor Nongrum ula thep kol ha ka 60 bad 63 minit, u Wanpynshngain Nongsteng ula thep kol ha ka 66 minit, u Khangmiki Pale ula thep ha ka 78 minit bad u Wallamsuk Nongkhlaw ula thep ia ka kol ha ka minit kaba 82 kaba la pynjem khnap syndon ia ka Ryntih FC.
Kane ka jingjop kala pynlong ia ka Nangkiew Irat ban ioh 25 point na ki 17 tylli ki jingiakhun bad ka dang sah sa kawei ka jingiakhun ha kane ka lympung ialehkai. Ka Langsning FC kala ioh 24 point bad kala dep ban iakhun lut ia ki jingialehkai ki jongka katba ka Laitkor SC kala ioh 23 point bad don ha ka kyrdan kaba 6 hynrei ka dang sah sa artylli ki jingiakhun.
Hynne ka nsgi, la pynlong ia ka jingsngap jar kaba shi minit shwa ban sdang ka jingialehkai, kum shi bynta ban kynmaw burom ia u Bah SS Rapthap uba long u Vice-President jong ka Shillong Sports Association, uba la khlad noh ha ka sngi Saitjain bad ka jingleh burom ia ka met kaba sah ka jongu kan long ha ka sngi Baar, kumta ka SSA kala rai ban yn don kano kano ka jingialehkai lashai ka sngi.
Ha ka jingiakhun kaba hynne ka sngi, ha ka kylla step kitei ki ar tylli ki kynhun kim shym la lah ban thep kol ha ka kylla step watla kila ioh ia ki kabu hynrei dei ha ka kylla Miet ba ka Nangkiew Irat kala pynjem khnap ia ka Ryntih da kaba thep syndon haduh 6 kol ban ioh khur iaka jingjop.
Ha ka sngi Balang ka jingiakhun kan long hapdeng ka Shillong Lajong FC pyrshah ia ka Rangdajied United FC ha ka por 3 baje mynsngi bad ha ka jingiakhun kaba la long ha ka 24 tarik u Risaw 2024 ka Lajong kala jop da 2-1 ia ka Rangdajied.
