Shillong, Aug 21: Ka Nangkiew Irat kala khur ia ka jingjop da kaba pynliem ia ka Mawlai da 2-0 ha ka Shillong Premier League 2025, kaba la long hynne ka sngi Palei ha SSA Stadium, First Ground, Polo.
Ka Nangkiew Irat kala khur ia kane ka jingjop kaban sah jingkynmaw kadei lyngba ka kol kaba la thep da u Himanshu Patil ha ka 14 minit bad u Ronaldkydon L Nonglait ha ka minit kaba 68.
Ha ka jingiakhun ia ka SPL naduh u snem 2022 kane kadei ka sien ka baar ba ka Mawlai kam shim la lah ban thep kol bad kadei ruh ka sien kaba saw naduh u snem 2022 ba kin rem ha ka jingiakhun ha ka SPL da kaba shah pynliem ha ka Nangkiew Irat.
Kine baroh ar tylli ki kynhun kila ioh ia ka jingjop ha ka jingsdang ia ka jingiakhun jong ka SPL 2025 ha kaba ka Mawlai kala pynrem da 6-2 ia ka Sawmer katba ka Nangkiew Irat kala pynrem da 3-1 ia ka Nongrim Hills.
Kane ka jingjop ka Nangkiew Irat mynta kala kiew sha ka kyrdan kaba nyngkong ban ioh khur 6 point.
Mar ia sdang hi, ka Mawlai kala pyrshang ban ialehkai bha hynrei ka Nangkiew Irat kala ialeh ban pynsuki noh ia ka rukom ialehkai wat shwa ba kan ioh thep kol, kane kala nang pynklumar khlieh ia ki nongialehkai ka Mawlai bad kala don ruh ka jingbakla ha ka rukom ialehkai ki jongka kaba la poi syndon sha u pud ban shah thep kol ha ka kylla miet.
Watla ka Mawlai kala shah thep 2 kol hynrei kam shym la kynran dien hynrei kala bteng ban ialehkai bha bad ban thaw ia ki lad ban ioh thep kol hynrei kine ki jingpyrshang kim shym la lah ban seisoh satia haduh ban da ka kut ka jingialehkai khamtam haba la sakhi ba ki nongialehkai shadien jong ka Nangkiew Irat kila khlain bha.
Ka jingiakhun ia ka SPL 2025 kan bteng biang ha ka sngi Thohdieng ha kaba ka Shillong Lajong kaba bat ia ka nam lahduh ne Champion kan iakhun pyrshah ia ka Malki ha ka por 4:30 nohphai sngi.
