Shillong Iaiong 23: Ki Mawlai SC kala ioh rung sha ka Semi Final jong ka Shillong Premier League 2023 da kaba pynrem ia ka Shillong Lajong FC da 5-0 hynne ka sngi Baar, ha ka jingiakhun kaba la long SSA Stadium, First Ground, Polo.
Mar ia sdang ka jingiakhun ha ka minit kaba 12 u Fullmoon Mukhim ula thep ia ka kol na ka bynta ka Mawlai hadien ba kala don ka jingbakla ha kaban shut ia ka bol ha kaba u Fullmoon ym shim la pynlehnoh ei. Tang hadien kane, ka Mawlai SC ruh kala kum bakla hynrei hashwa ba u Deibormi Tongper jong ka Lajong katei ka bol kala kham jngai bad ka Mawlai kala lait na ka jingma.
Ka jingiakhun ha ka kylla step kala kut haka jingioh thep shi kol ka Mawlai katba ka Lajong kam shym la lah ban thep kol eiei ban pyniakhaid ha ka kylla step.
Ka kylla miet kala long na ka bynta ka Mawlai SC ha kaba kala ioh ban thep haduh 4 kol kata, ha ka minit kaba 47 lyngba u Kevin Rymbai, u Brolington Warlarpih ha ka minit kaba 49, u Donlad Diengdoh ha ka minit kaba 72 bad u Romarius Laban ha ka minit kaba 76 kaba la pynjem khnap syndon ia ka Lajong.
Ka Lajong kala ioh ia ki kabu haka kylla miet lyngba Shano Tariang hynrei u rangap kol ka Mawlai u Siwel Rymbai ula ioh ban iada noh iaka bol ban rung shapoh kol, nalor kane u Deibor ruh ula ioh ia ka lad hynrei yn shim la lah pat ban thep.
Ka Mawlai kala kamai 13 point bad kam pat rem shisien ruh ha ka jingiakhun bad kala long kaba thikna ba kan dei ka kynhun kaban don ha ka Top 4 jong ka Round Robin bad ban rung syndon sha ka Semi Final.
Ka Lajong kan dang ialehakai sa arsien bad kan hap ban jop ha baroh ar tylli ban ioh rung sha ka Semi Final.
Ka jingiakhun lashai ka sngi Balang kan long hapdeng ka Ryntih SC pyrshah ia ka Sawmer SC ha ka por 3:15 mynsngi.
