Shillong, Iaiong 30: Ka Sawmer SC kala pynkut ia ka jingiakhun kaba khatduh ha ka SPL-2023 da ka jingjop pyrshah ia ka Nongthymmai SC da 2-1 ha ka jingiakhun ba long hynne ka sngi Ba-ar ha SSA Stadium, First Ground, Polo.
Mar ia sdang ka jingiakhun ka Sawmer kala ialehkai bha bad ha ka minit kaba 11 la thep ia ka kol lyngba u Shining Nongdhar bad u Rheadolf N Daloi ula thep ia ka kol ha ka minit kaba 30.
Ka nongthymmai kam shym la lah ban thep kol eiei ha ka kylla step hynrei haka kylla miet ha ka minit kaba 67 u Rabi Hansda ula ioh thep ia ka kol na ka bynta ka Nongthymmai bad kane ka kol kadei ruh ka kol kaba 100 kaba la thep ha ka SPL 2023.
Kine baroh ar tylli ki kynhun kila ioh rung sha ka SPL hadien ba kila jop ha ka First Division, ha kaba ka Sawmer kala rah ia ka nam Lahduh katba ka Nongthymmai kala wan baar.
Ka Sawmer kala pynkut ia ka jingiakhun ia ka SPL da kaba kamai 6 point bad ka don mynta ha ka kyrdan kaba 6, katba ka Nongthymmai kala kamai 3 point bad ka dang sah sa ar tylli ki jingiakhun.
Ka jingiakhun ha ka sngi Balang kan long hapdeng ka Nangkiew Irat pyrshah ia ka Shillong Lajong FC ha ka por 3:15 mynsngi.
