Shillong, Risaw 31: Ka Nongthymmai SC kaba la mad iaka jingrem, hynne ka sngi pat kala iohmad iaka jingjop da kaba pynrem ia ka Nongrim Hills SC da 3-0 ha ka OC Blue Shillong Premier League 2024 kaba la long ha SSA Stadium ha First Ground, Polo, hynne ka sngi Palei.
U Michaelson Kurbah ula thep iaka kol ha ka 40 minit, u Ronald Singh Shaikhom ula thep ha ka 57 minit bad u Istarbor Marngar ula thep ha minit kaba 59 kaba la pynthikna syndon iaka Nongthymmai ban ioh khur ia ka jingjop kaba nyngkong ha kane ka samoi ialehkai kaba mynta.
Kane ka jingjop kala pynkut syndon iaka jingmad jingrem kaba 7 sien lynter naduh ka SPL 2023.
Ka Nongthymmai kala ialehkai bha ha ka kylla step bad kala ioh thep ia ka kol ha lyngba u Michaelson kaba la pynlong iaka Nongthymmai ban tam das hi kol.
Ha ka kylla miet ki nongialehkai ka Nongthymmai kila bteng ban ialehkai bha bad ha ka minit kaba 55 u Ronald ula ioh ia ka kabu ban thep iaka kol hynrei ka bol kaba ula shut kala dei ia u dieng kol bad tang hadien ar minit ula ioh para marwei bad u nongap kol ka Nongrim Hills u Urbanity Makhroh bad u Ronald ula ioh ban thep ia ka kol.
Hadien katei, ha ka minit kaba 59 u Ronald ula pynbuh ia ka bol ia u Istarbor ha kaba ym shim la pynlehnohei ban thep ia katei ka bol shapoh ka kol.
Ka Nongrim Hills ruh kala ioh bun tylli kikabu ban thep kol hynrei kam shymlalah pat ban thep kol ha ka kylla step ne wat ha ka kylla miet.
Ka jingjop ka Nongthymmai kala pynlong mynta ia baroh 10 tylli ki kynhun la kumno kumno kila lah ban ia jop mar shisien, ka Rangdajied United FC, Nangkiew Irat SC, Nongthymmai, Ryntih FC bad Langsning FC kila ioh khur mar 3 point.
Ka Nongthymmai kan iakhun pyrshah ia ka Laitkor SC ha ka 4 tarik u Naiwieng ha ka por 5:30 janmiet.
