Shillong, Kyllalyngkot 24: Ka Mawlai SC bad ka Shillong Lajong FC kila khur biang ïa ka jingjop ha ka jingïakhun pyrshah ïa ka Ryntih FC bad Sawmer SC ha ka OC Blue Shillong Premier League 2024 kaba la long hynne ka sngi ha SSA Stadium First Ground, Polo.
Ka Mawlai kala pynliem ïa ka Ryntih da 10-1, katba ka Lajong kala pynrem da 6-0 ïa ka Sawmer.
U Yohaan Benjamin ula thep ïa ka kol ha ka 10 minit, u Riborlang L Lyngkhoi ha ka 25 minit, u Deibormame Tongper ula thep kol ha ka 27 bad 61 minit bad u Babysunday Marngar ula thep ha ka 54 bad 59 minit na ka bynta ka Lajong.
Katba ka Mawlai kala thep 10 kol lyngba u Khrawkupar Jana ha ka 27 minit, u Fullmoon Mukhim ha ka 33 minit, u Samlang Rympei ha ka 39 minit, u Arkibor Makhroh ha ka 43 minit, u Baiaikara Swer ula thep kol ha ka 48 bad 89 minit, u Reformer Pale ha ka 66 bad 78 minit, u Banskhemlang Mawlong ula thep kol ha ka 70 minit bad u Overkindness L Mawnai ula thep ha ka 90’+1 minit.
U Basuklang Bina ula ioh thep ïa ka shi kol ha ka minit kaba 56 minit na ka bynta ka Ryntih.
Kane ka jingjop kala pynlong ïa ka Mawlai ban don ha ka kyrdan kaba nyngkong da kaba kamai 28 point katba ka Lajong ka don ha ka kyrdan ka baar kaba la kamai 25 point,
Ka Sawmer ka don ha ka kyrdan kaba 7 bad ioh 11 point katba ka Ryntih ka don sha traiduh da kaba ioh tang 3 point bad kala mad ïa ka jingrem kaba khyndai sien lynter.
Ha ka sngi Saitjain, ha ka por 11 baje ka jingïakhun kan long hapdeng ka Nangkiew Irat SC pyrshah ïa ka Langsning FC bad ha ka por 2:30 mynsngi ka jingïakhun kan long hapdeng ka Rangdajied United FC pyrshah ïa ka Nongrim Hills SC.
Ha ka jingïalehkai ha ka wat kaba nyngkong ka Nangkiew Irat kala pynrem da 3-1 ïa ka Langsning ha ka 29 tarik u Risaw 2024 katba ha ka 8 tarik u Naiwieng 2024 ka Rangdajied kala pynrem ïa ka Nongrim Hills da 1-0.
