Bongaigaon, Naitung 08 : “Shen yn ym don kawei ruh ka skul ka ba khlem don nonghikai hapoh Assam. Lyngba ka hukum jong u Myntri Rangbah (CM) Himanta Biswa Sarma, ka tnat pule puthi kan trei shitom ban pynurlong ia kane,” ong u Myntri ka tnat pule puthi ka jylla u Dr Ranoj Pegu ha ka jingialang ba la pynlong hapoh ka conference hall jong ka ophis u Deputy Commissionerha Bongaigaon hynnin ka sngi Palei.
Ia kane une u myntri u la pynpaw ha ka zonal conference jong ki ophisar jong ka lower Assam education zone. U Dr Pegu u la ong, “Kito ki skul ki bym don nonghikai wat tang iwei ruh kin pyniasoh bad ka skul ka ba don marjan eh bad ka ba biang ki nonghikai. Ka jingpynshongnia ha ka ba iadei bad ki nonghikai, ka mat ka ba iadei bad ki skul ki ba shu ker da ki siej bad u skul bad kiwei kiwei pat yn sa shimkhia kloi katba lah.”
“Ia ka mat ka ba iadei bad ki jingeh halor ka jingtei ia ki skul yn sa lah ban pyndep ha kine ki ar snem ki ban wan, bad baroh ki ophisar kin hap ban shim bad trei ia la ka jong ka jong ka bynta,” ong une u myntri.
Nalor kata u la kyntu ruh ia ki ophisar ba kin pyntip ha ka ba iadei bad ki post jong ki nonghikai ki ba la thylli khnang ba ka sorkar kan lah ban thung da kiwei pat ki nonghikai ki ba thymmai ha kine ki jaka ba suda.
Une u myntri u la ong ruh ba ki ophisar ki dei ban pyntip kham kloi ha ka ba iadei bad ki nonghikai ki ba la shongthait khnang ba na ka liang ka sorkar kan lah ban shim ia ki sienjam ki ba donkam, ong u Dr Pegu u ba la ban ruh halor ka jingdonkam ban pynrung skul ia ki khynnah bad ruh ban kyntiew ha ka jingnang jingtip hapoh ki skul. “Na ka bynta ki klas IX bad X, yn pynkhreh ban pynlong da ka digital klas,” ong shuh shuh u Myntri.
Kham hashwa ha ba kren ha ka jingialang, u Deputy Commissioner ka Bongaigaon u Nabadeep Pathak u la ai ia ka jingkren pdiang da ka ba pynpaw ruh halor ka jingpass bha jong ki khynnah. Ha kane ka jingialang la wan iashim bynta ruh da u Bharat Bhusan Dev Choudhury, Secretary ka Secondary Education, Dr. Bijoya Choudhury, Secretary Elementary Education, Mamata Choudhury, Director Secondary Education, Suranjana Senapati, Directo Elementary Education, nalor kiwei pat ki ophisar.
