Shillong, Risaw 13 : Ka Expert Committee ba 10 ngut ki Dkhot, kaba la khlieh da u Principal Chief Conservator of Forest (PCCF) & HoFF BK Lyngwa, shen kan sa wanrah ia ka action plan ban pynkhuid bad pynim pat ia ki wah bala jakhlia ha Jylla Meghalaya.
Kane ka Committee ka dei kaba la thaw ha ka 23 tarik u Jylliew kat kum ka hukum jong ka Iingkashari Meghalaya High Court ba kan ai jingmut ia ka Sorkar Jylla halor ki sienjam ba donkam ban shim ban pynkhuid bad ai jingiada ia baroh ki wah kiba don ha Jylla.
Ka Committee kan ai jingmut ruh ia ka Sorkar Jylla ban pyndonkam ia ki kor thymmai ka juk bad ki rukom pyntreikam ia ki ha kaban pynkhuid bad pynkhie im ia ki wah.
Hynrei, ki hynniew tylli ki wah ba kynthup ia ka Wah Umkhrah, Umshyrpi, Umtrew, Lukha bad Myntdu – kaba la khmih da ka River Rejuvenation Committee – ki dei kiba la pyllait na ka jingkhmih jong ka Committee.
Nalor kine, sa 53 tylli ki jaka lang um kiba la khmih da ka Wetland Authority bad palat 60 tylli ki wah ki dei kiba la pyllait na ka jingkhmih ka Expert Committee.
Hadien ba pyniaid ia ka jingialang ba-ar jong ka Committee, u Bah Lyngwa ula ong “Ngi dang pynkhreh mynta ban thaw ia ka action plan bad ka jingkylli halor ka jingbei tyngka kan sa mih hadien – Yn sa ithuh ia ki kat kum ka jingdonkam bad haba dawa ka kam. Ka action plan kan long kat kum ki jaka jaka jong ki Wah bad kan treikam ha baroh kawei ka Jylla lait noh tang kito ki wah kiba hap hapoh ka jingiada ka Tnad Wildlife, Reserve Forest bad ki Wah kiba khmih da ka State Westland Authority bad ka River Rejuvenation Committee bad ki pung dohkha”.
Ula ong “Ka action plan kan dei kaba phiah ha ki saw bynta- kawei kan dei kaba long ha ka dur jong ki jingai jingmut, kaba ar long ka jingbuh kyndon, kaba lai kan long ka jingiashimbynta lang bad kaba saw ka long ban pynkylla biang ia ki wah sha ka mynnor”.
U Bah Lyngwa u pyntip ba ka Committee ka dang pynkhreh ruh ban bthah ia ki Deputy Commissioner ba kin ai jingtip ia kum kine ki jait wah.
Don katto katne ki District kiba la dep ai ia ki jingtip ha kaba khyndai tylli ki wah la dep ban ithuh ha East Jaintia Hills, East Garo Hills-26, South Garo Hills-12, North Garo Hills-24, South West Garo Hills-12 bad West Garo Hills-12.
Kiwei pat ki District kia dep aiti ia ki jingtip hynrei kila ailing bad bun bah ki pung dohkha bad namar kane, kala pynkulmar ia ka jingkhein ha kaba ka Committee kala rai ban nym shim ia kane ka jingtip.
“Namar kata, ngi la aipor 10 sngi ia kine ki District ba kin phah biang ia ki jingtip kat kum kaba la buh (bala ai sha ki)” ula ong.
U Chairman ula pyntip ruh ba ka Committee kan sa pynlong ia ka jingwad bniah shaphang ki wah ha ki ar aiom-ka aiom rkhiang bad aiom slap ban lum ia ki sabut ba iadei bad ka jingjaboh lem bad kiwei kiwei. La khmih lynti ban pyndep ia kane hapoh ka hynriew bnai.
Haba kylli la ka Committee kan khmih lang ne em ia ki wah kiba don ha ki jaka ba don ki par dewiong jong ki District ka Jylla, u Bah Lyngwa ula ong “Ka Sorkar kala dep ban leh eiei lyngba ka pilot project kaba la dep pynlong ha Wah Lukha bad mynta ngin leh ia kane ka juh sha kiwei kiwei ki wah. Hynrei, lada don kino kino ki wah ba don ia ka Acid Mine Drainage (AMD) ba khlem pat khmih da ka River Rejuvenation Committee, khlem pep ngin sa khmih lang noh”.
Ha kajuh ka por, u Dkhot ka Committee u Nababrata Bhattacharjee ula ong ba ki don haduh 10,000 tylli ki wah kiba la pynrung ha ka thup jong ka kaiphod ba nyngkong, kaba la aiti da ki District sha ka Committee. Hynrei, kiba bun na kine ki dei ki pung Dohkha.
“Hynrei, ka Committee kala rai ban nym shim jingkhein satia ia ki pung dohkha (kum ki Wah) bad haba khate noh ia ki, ngi sngew ba ka jingdon ki wah ka long tang katto katne spah” ula ong.
U Bhattacharjee uba dei ruh u Chairman ka State Expert Appraisal Committee, ula ong ba ka Expert Committee kala dep phah ia ka format sha baroh ki Deputy Commissioner ba kumno kin ithuh ia ki Wah, kiba la shah ktah, shah pynjaboh bad ba jakhlia.
U iathuh ba la bthah ruh ia ki Deputy Commissioner ba kin plie ia ka kynja Helpline number da kaba pyndonkam ia ka Whatsapp ban pyniadon bynta lang ia ki kynhun bapher bapher ha kaban pynthikna ba kane ka jingpyrshang jong ka Committee kan ym kut tang ha ki saw kynroh.
“Ngi kwah ba ki paidbah ruh kin iadon bynta lang naba ki wah ki dei ki nongkynti jong ka Jylla bad lada kine ki jakhlia noh, kan long ka jingduh kaba khraw bha” ula bynrap.
