Shillong, Nohprah 11 : Ka Sorkar Jylla kan sa sdang noh shen ia ki kam ki jam ban thungkam ia palat 1000 ngut ki nong hikai ha ki skul bad college Sorkar ha kylleng ka Jylla.
Haba pyntip ia kane ha ka sngi Balang, u Myntri ka Tnad Pule Puthi Rakkam A Sangma ula ong “Ha kane ka shibnai ban wan, ngin sa pynmih ia ka jingpynbna laitkam ba palat 1000 tylli ki kam ha ka Tnad Pule Puthi naduh ki jaka pule jong ka Higher & Technical Education, College bad Higher Secondary, Secondary bad Primary School”.
“Ha kine ki ar-lai taiew, ngin sa pynmih ia ka jingpynbna ban pyndap ia baroh kine ki kam kiba lait” ula bynrap.
U Myntri ula ong ba ka rai jong ka Sorkar ban sdang ia ki science stream ha ki san tylli ki college bad commerce stream ha ki lai tylli ki college, kala lam sah ka jingpynkha kam ba palat 248 tylli.
“Ngin sa pynmih shen ia ka jingpynbna laitkam ban pynthikna ba kine ki course kin ioh sdang noh ha u snem pule ban wan” ula ong.
Nalor kane, u Myntri ula pyntip ba ka Sorkar kala pyndep ia ka jingthungkam ia ka Vice Chancellor ka Captain Williamson Sangma State Univeristy.
“Ngi kwah ban sdang ia katto katne ki post graduate course naduh u snem pule ban wan. Kumta, ka University kan sa khot ia ka jingthungkam mardor kham kloi kat kaba lah” ula bynrap.
