Shillong, Lber 05: Ka jingpynrung kam pulit na ka bynta ki 3100 tylli ki kam kiba lait ha ka Meghalaya Police, kan sdang noh shen.
Ia katei la pynbna hynne ka sngi da u Inspector General of Police uba long ruh u Chairman jong ka Recruitment Board u Bah Francis Kharshiing haba iakren bad ki nongthoh khubor, hynne ka sngi.
U Bah Kharshiing ula ong ba katei ka jingpynrung kam ka kynthup ia 76 tylli ki post ha ka Unarmed Branch Sub Inspectors, 1255 Unarmed Branch Constables bad 1637 tylli ha ka Armed Branch Constables.
Katei ka jingpynrungkam kan long ha ki 5 tylli ki Sectors kaba kynthup ia ka 1st Battalion ha Mawiong, kaban peit ia kane ka thaiñ, ka 2nd MLP na ka bynta ka West Garo Hills, ka 3rd Battalion ha Sahbsein na ka bynta ka Jaintia Hills, ka 4th Battalion ha Sohpian na ka bynta ka West Khasi Hills bad ka 5th Battalion ha Williamnagar na ka bynta ka East bad South Garo Hills.
Ka jingphah ia ka aplikeshon lyngba ka Online kan sdang naduh ka 1 tarik u ïaiong.
U Director General of Police u Dr LR Bishnoi ula ong, “Kane kan dei ka jingpynrung kam kaba heh tam ha ka histori jong ka Meghalaya Police bad yn nang pynkhlain shuh shuh ia ka Meghalaya Police da palat 3000 ngut ki pulit.”
Ula pynthikna ruh ba kan ym don kano kano ka jingleh buittuh lyngba ka Transparent Recruitment Process (TRP).
U DGP ula ong, hadien ba la dep pynlong ia ka elekshon MP, katei ka jingpynrungkam kan sa sdang ban iaid bha shakhmat.
