Shillong, K’lyngkot 30 : U Symbud Myntri Rangbah Bah Sniawbhalang Dhar ula pynpaw ba ka jing thied ia ka jaka na ka bynta ban pynlong jaka theh niut ha Shillong ka dang sahteng namar ka jingiakren pynbeit ka dang iaid halor ka dor ka mur bad ki trai jaka.
Haba iakren bad ki nongthoh khubor, ula pyntip ba ka Sorkar kala dep ithuh ia ka jaka ha ka shnong Nonghali bad mynta ka dang iakren bad ki trai jaka ban pynbeit ia ka dor ka mur.
“Mynta kaba sah ka dei tang ka jingiakren pynbeit” ong u Bah Sniawbhalang haba bynrap ba ka jingpynlong ia ka public hearing ha Nonghali kala iaid beit iaid ryntih.
Lah ban kdew hangne, hashuwa kane, ka jingpyrshah kala mih halor kane ka project namar ba ka lah ban ktah ia ka wah Umkhren, ka tyllong um kaba kongsan ia ka thain. Ka Sorkar kala kular ba kane ka jaka theh niut kan dei kaba shna kat kum ka juk stad saian ban tehlakam ia ka jingpynjot pynjulor ia ka mariang.
