Shillong, Lber 21: U Symbud Myntri Rangbah ka jylla ba khmih iaki kam pynroi sor Bah Sniawbhalang Dhar u la ong ba shen yn sa pyntreikam noh ia ka Meghalaya Urban Parking Policy 2025 ban teh kyndon ia ka jingpynieng kali ha ki surok hangne ha Sor bad kane kan iarap ia ka jingdheng kali ha kane ka nongbah Shillong.
Haba kren sha ki lad pathai khubor, u Bah Sniawbhalang Dhar u la ong, “Ka jingpyntreikam ia kane ka polisi pynieng kali kan iarap ban pynduna ia ka jingieng kali ha surok bad yn ym don mano mano ba lah ban shu pynieng kali kumto ha surok.”
Kat kum ka jingong u Bah Sniawbhalang, “Ka jingpynieng klumar ia ki kali ha ki surok ka la long kawei na ki daw ba wanrah ia ka jingkhapngiah kali hapoh sor” bad bynrap ruh “Ka tnad kan sa peit ia ki jaka ban shah pynieng kali ha surok,”.
U Symbud Myntri Rangbah u la ong ruh ba, “Ha kane ka polisi pynieng kali yn thaw ia ka lad ki lynti da kaba shim da ka dor ia ka bai pynieng kali bad ki paidbah kin ym lah shuh ban shu ieng klumar namar yn ai ia ki zone ha ki surok ha kaba ki paidbah ki lah ban ieng kali bad kaba kim lah ban ieng kali”.
Ha kajuh ka por, u Symbud Myntri Rangbah u la pyntip ba ka sorkar ka la rai ban pynkynriah noh ia ka Secretariat sha ka New Shillong kum shi bynta ban pynduna ia ka jingkhapngiah ha nongbah.
“Kane kan sa iarap shibun bad kum ka sorkar ngin dang ïakren ban leh ïa ki kam ban pyrshang wanrah bun ki lad ki lynti ban pynduna ïa ka jingdheng kali ha ka nongbah,” u la ong.
