Shillong, Lber 21: U Symbud Myntri Rangbah ka kam pynroi sor Bah Sniawbhalang Dhar, u la pyntip ba ia ka iew ha Polo ne ka market complex yn sa lah ban pyndep noh ha u bnai Nohprah mynta u snem.
Haba kren sha ki lad pathai khubor ha ka sngi Thohdieng, u Bah Sniawbha u la iathuh ba dang shen u la leit ban jurip hi ia katei ka iew ha Polo kum shi bynta ban pynsted ia ka kam.
“Ka dang don sa khyndiat ki kam kiba dang sahteng bad tang shu dep ban pynbeit ia kata ngin sa plie noh ia ka. Nga tharai ha u bnai Nohprah ngin lah ban pyndep ia kane ka projek,” ong u Bah Sniawbhalang.
Halor ki jingbuh ia ki dukan, u Symbud Myntri Rangbah u la ong ba shen ka tnad kan sa khot ia ka expression of interest (EOI) bad ong “kumba ka long mynta, ngin dang ban shim ia ka rai kumno ban leh ia kane”
Halor ka jingtyrwa ban pynkynriah ia ki nongdie die madan na Khyndailad, u Bah Sniawbha u la ong, “Ki dang hap ban pynbeit ia ka tarik. Wat khuslai ngin sa pyndep ia kane ka kam bad ki kam ki jam kila iaid mynta”.
