Agartala, Nailar 24 : Ka kynhun myntri ka Tripura hynnin ka sngi ba Ar kala ai ka jingmynjur halor ka jingtyrwa ban pynher ia ki liengsuin kamai lyngba ki jaka suin hapdeng ka Tripura bad ka Bangladesh shibynta ban kyntiew shuh shuh ia ki kam khaii pateng bad ka ioh ka kot.
Ia kane la pyntip da u myntri sorkar ka Tripura, u Sushanta Chowdhury.Une u myntri ula ong ba ka kynhun myntri ka Tripura hapoh ka jingialam jong u Myntri Rangbah (CM) Manik Saha kum u chairman kala ai ka jingmynjur halor ka jingtyrwa ban pyniasoh hapdeng ka MBB Airport kaba don ha Agartala bad ka Chittagong.Ka bai shong liengsuin na ka bynta marwei kan long T.4500.
Ka sorkar jylla hadien ka jingiamir jingmut bad ka tnat pyniaid liengsuin (Civil aviation Ministry) kala shim ia ka rai ban pynher liengsuin hapdeng ka Agartala bad ka Chittagong. “Ngi la ioh pdiang ia ki artylli ki jingjied, kata la ngin leit lyngba ka lynti na Agartala sha Dhaka lane na Agartala sha Chittagong.Kumta ruh hadien ka jingiamir jingmut la shim ia ka rai ban pyntreikam ia ka lynti pynher liengsuin lyngba ka Agartala-Chittagong,” ong utei u myntri ka Tripura.
Nalor kata une u myntri u pyntip ruh ba ka jingpynher liengsuin lyngba kine ki lynti suin kan long laisien ha ka shitaiew.
“Laisien ha ka shitaiew kine ki liengsuin kin ai ka jingshakri lyngba ka MBB Aiprort ha Agartala. Shibynta jong ka jingsdang ia kane ka jingai jingshakri lyngba ki liengsuin, na ka liang ka sorkar jylla kan pynlut T.15 klur kum ka jingiarap pisa ne ka Viability Gap Funding (VGF)”, ong shuh shuh utei u myntri.
Katkum une u myntri, ka VGF ka dei ka jingiarap pisa ia kaba ju ai sha ki kompeni pyniaid liengsuin khnang ba kin ym iaid ha ka jingduh nong ha ki sngi jong ka jingsdang hadien ba la sdang ia ka jingai jingshakri.
