Guwahati, Nailar 28 : U Chief Public Relation Officer ka Northeast Frontier Railway Sabyasachi De, u pyntip ba ka thain Shatei Lam Mihngi,kan sa ioh shen ia ka lynti rel ba nyngkong eh ka ban pyniasoh sha shiliang u pud u sam ka Ri.
Ula pyntip ba halor ka jingpyntreikam ia ki jingtei kiba donkam na ka bynta kane ka lynti rel, ka Sorkar kala mang haduh T. 1.20 klur ban pyniasoh ia kane ka jaka lum bad ki jaka khappud.
“Ka jingpynleit jingmut jong ngi ka long eh ha khappud ka India-China. Ngi la phaikhmat sha Myanmar, ka Imphal-Moreh line ruh kala ioh ia ka jingmynjur” ula ong.
Ka Sairang-Hbichhuah railway line, kaba don shathie jong ka Mizoram bad kaba iasoh bad ka Kaladan Multimodal Project ruh kala ioh ia ka jingmynjur. Ka Kokrajhar-Gelephu railway kan iasoh bad ka Bhutan. Ha ka por kaba lyngkot, ngin sa plie noh ia ka Agartala-Akhaura railway project.
U De ula ong ruh ba kin don shibun ki project ba iasoh sha shiliang par hynrei ka jingpynleit jingmut jong ngi kan long eh ha kaban pyniasoh lynti rel sha baroh ki jaka khappud bad ban kyntiew ia ka khaii ka pateng bad ki ri kiba marjan. Ka Sairang-Hbichhuah railway project kan dei ka khyrdop jong ngi sha ka Sittwe Port ha Myanmar.
U De ula ong ba bun ki project kiba kongsan kiban pyntrei ha ka thain Shatei Lam Mihngi kin dep ki project ba pyniasoh ia ki Nongbah jong ki Jylla ba kynthup ia ka Sikkim, Mizoram, Manipur bad Nagaland.
“Ngi la dep pyniasoh bad baroh ki Jylla ba dang sah jong ka thain Shatei Lam Mihngi. Nalor kata, ngi la don ruh ki lynti rel ba thymmai kum ka Murkongselek-Pasighat. Kane ka dei ka project ka bym iasoh bad ka Nongbah ka Jylla hynrei hooid ka dei ka jingpyniar ia ka lynti rel kaba ju kot ha Murkongselek, Assam bad mynta kan leit shaduh sha Pasighat ha Arunachal,” ong u CPRO.
Ula bynrap “Ngi don iaka jingkynshew pisa ba palat T. 1 lak klur ha kane ka snem mang tyngka ba mynta ban pyndep ia ki project bad kane ka dei ka song pisa kaba bun bad ngi la pynleit jingmut ban pynkhlain ia ka jingiasoh lynti rel ha baroh ki Jylla ka thain Shatei Lam Mihngi”.
