Shillong, Nohprah 21 : U Chief Executive Member (CEM) ka KHADC Bah Pyniaid Sing Syiem ha ka sngi Palei ula pyntip b aka Executive Committee kan sa leit iakynduh shen ia ka Sorkar Jylla ban tip ba haduh katno ka kam kala poi haba iadei bad ka jngtyrwa ban ai jaka na ka bynta ban pynkynriah noh ia ka Council Building na Garikhana.
Haba jubab ia ka jingkylli bala wanrah da u Nongialam ka Liang Pyrshah Bah Titosstarwell Chyne ha ka Dorbar Tlang, u Bah Pyniaid ula ong ba kane ka EC ba mynta kala iakren ia kane ka kam bad la iakren ruh ia ka wat hapoh ka Iingdorbar la bun sien.
U Bah Pyniaid u pyntip ba ka EC kala iakynduh ruh ia u Myntri Rangbah ka Jylla Conrad K Sangma bad Symbud Myntri Rangbah ba khmih ia ka Tnad pynroi sor Bah Sniawbhalang Dhar la saw bnai mynta bad la kyrpad ia ka Sorkar ba kan ai jaka lem ia ka Council ba kan ioh pynkynriah noh ia ka Ophis na ka jaka ba don mynta.
Kat kum ka jingong jong u, ka shithi bala phah da ka Council haba iadei bad kane ka kam, kala don hapdeng ka jingbishar jong ka Tnad pynroi sor.
“Ngin sa pyrshang ban iakynduh biang shen ia ka Sorkar ban sngewthuh ba shano kane ka kam kala poi” ula ong haba pyntip ba ka Council kala kyrpad ia ka Sorkar ba kan ai jaka ia ka Council marjan ka Iingdorbar Thaw Ain ba thymmai ka Jylla ha Mawdiangdiang, New Shillong Township.
