Nongpoh, Nohprah 21 : Tang shisngi hadien ba pynskhem, ka NPP- Nongpoh Block kila iakynduh ia u Symbud Myntri Rangbah ba khmih ia ka tnad PWD (Road) Bah Prestone Tynsong ban pynsngew ia ka jingdonkam kyrkieh ban shna pynbha/maramot ia ka surok Nongpoh-Umden-Sonapur kaba la shu ieh da ki phew snem bad kup ia ka dur ba jot rathai.
Ki Nongialam ka NPP-Nongpoh balaialam da u President Bah Henry Nongrum, kila iakynduh ia u DyCM ha iingsah jong u Rangbah Shnong ka Umden, Diwon.
U President ka NPYF Ribhoi samla Pyndaplang Wahlang bad Nongaiktien ka NPP-Nongpoh Bah Thomas Malai, kila iathuh ba ka jingiakynduh ka long ban pynsngew ia ka jingeh ki paidbah ka thain Nongpoh-Umden kiba la mad ia ka jingsohsat bad jingsyllang namar ka jingsniew shaba palat liam jong ka surok Nongpoh-Umden-Sonapur.
Ki iathuh ba u DyCM ula ai ka jingkular ba un sa buh ia ka mang tyngka ban shna pynbha noh ia kane ka surok ym tang haduh Marmain hynrei ka ban mih beit beit shaduh Byrnihat.
