Shillong, Kyllalyngkot 03: Ka Kutumba Surakshya Parishad (KSP) ha ka sngi Thohdieng kala pynpaw ia ka jingshaniah skhem ha ki bor pyniaid district bad ka Dorbar Shnong Mawsynram bad ong ba ka jingshim rai jongki ha kaba iadei bad ka Krem Mawjymbuin kan sa batai ia ka sienjam kaba kin shim nangne shakhmat.
Ia kane la pynpaw da u President ka KSP u Satya Ranjan Borah hadien ka jingwan iashimbynta ha ka jingialang kaba la lum da ka Deputy Commissioner ka East Khasi Hills ka Kong RM Kurbah ha kaba la iadonlang ki nongialam shnong jong ka Dorbar Shnong Mawsynram.
Haba pynbna ba ka kam kaba iadei bad ka Krem Mawjymbuin kala kut, u Borah ula ong, “Nga tharai haduh mynta ka kam kaba iadei bad ka Krem Mawjymbuin kala kut bad ngin sa ia peit ia kaei kaban jia bad kila pynmih ia ka hukum bad ngi ngeit ha kata”.
“Ngi ngeit ha ka jingialam jong ki bor pyniaid district jong ka Meghalaya bad ngin sa ap bad peit ha kine ki sngi ban wan bad kata kan sa batai ia ka sienjam kaba ngin sa shim” ula ong haba iakren bad ki nongthoh khubor.
U Borah ula ong ba ka kynhun jongka KSP kala ioh ia ka jingpyntip ha ka jingialang ba kam shym la don satia kano kano ka jingkhang pyrshah na ka liang jong ka dorbar shnong Mawsynram ban mane ia u maw Shivling hynrei ka kyndon ka long ba ym shah ban thang dhup, mombiti, bret syntiew bad kiwei kiwei.
“La shah ia baroh. Kam don kano kano ka jingkhang pyrshah. Baroh ki lah ban leit baroh 365 sngi naduh 9 baje mynstep haduh 5 baje janmiet hynrei kin hap pat ban bud ryntih ia ki kyndon jingbthah. Ki don ki kyndon jingbthah bad ngi pdiang ia kitei ki jingbthah” ula pyntip bad ka bynrap ba ka kynhun kala ioh ruh ia ka jingpynthikna ba kan don ka jingpynkhreh kaba kyrpang.
“Kam don ka jingkhang pyrshah ban lehniam hangtei. Ka jingmane ka long ba ngin shong bad buh jingduwai bad ia katei lah ban leh ha kano kano ka por ha kano kano ka jaka” la kam u President ka KSP.
Haba kyntait halor ka jingbyrngem byrsit, u Borah ula ong, “Kam don kano kano ka jingbyrngem na ka kynhun niam Hindu. Ki briew kila pynsngewthuh bakla ia kane ka kam.
Hooid, ngi ong ba ngin khang ia ka surok lada ym weng ia ka jingkhang pyrshah hynrei kila pynpaw ba kam don ka jingkhang pyrshah”.
Halor ka jingkylli, ula ong “Ngam lah ban ong eiei mynta namar ba ki bor pyniaid district bad ka dorbar shnong ki lah dep ban pynthikna ba kam don ka jingkhang pyrshah bad kin plie baroh 365 sngi naduh 9 baje mynstep haduh 5 baje janmiet. Ngi don ka jingshaniah ha ki. Kumta ngin sa peit ia kaei kaba ki leh bad ngin sa shim ia ka sienjam kaba nangne shakhmat”.
“Kan shong ha ki paidbah. Kadei ka rukom leh jong ki paidbah. Kadei ka kyrwoh kaba shai sha baroh ki paidbah ka Meghalaya, Assam bad kum ki nongshong shnong ka ri India – Ngi dei baroh ki nongshong shnong ka India bad ngi don ia ka hokbad ka kamram na ka bynta ka ri. Ki kam kiba ngi leh kidei ban long na ka bynta ban pynhlain ia ka jingitylli bad ban ia imlang sahlang hapoh ka ri” la bynrap u Borah.
Nalor kane, u president ka KSPula kyntu ia baroh kiba don ia ka jingsngewkhia ban burom ia ka riti synshar ka ri India.
“Nga kyrpad ia baroh, kiba na Meghalaya, Assam bad na kylleng ka ri India – baroh kidei ban burom ia ka riti synshar ka ri, baroh ki dei ban pynlong kordor ia ka riti synshar ka ri bad nga tharai ba shisien ba ngi pyndep ia la ka kamram kumba la kdew ha ka Article 51 (a) jong ka riti synshar ka ri, kam dei ban mih kano kano ka kynrum kynram ha kine ki sngi ban wan” ula ong.
Hadien kane ka KSP kala pyllait ia ka kyrwoh bad ong “ Ka Deputy Commission bad ki Nongmihkhmat na ka Dorbar Shnong ka Hima Mawsynram kila pynshai ba kam don satia kano kano ka jingkhang ban mane ia u Shivling ha krem Mawjymbuin bad kane kan plie ia ki riewngeit baroh 365 sngi naduh ka por 9 baje mynstep haduh 5 baje janmiet hadien ba bud ia ki kyndon bala bud”.
Une u Nongialam ka KSP ula pyntip ba ki nongialam na ka Seng Khasi Hima Mawsynram bad ka Meghalaya Indigenous Minorities Tribal Forum (MIMTF) kila wan iakynduh ia ki nongialam ka KSP halor kane ka kam bad kila pan ia ka jingkyrshan na ka seng ban ioh ia ka hok ban mane ia u maw Shivling ha krem Mawjymbuin.
U pyntip ba ki Nongialam ka Seng Khasi Hima Mawsynram kila wan sha ka Ophis ka KSP kaba don ha Chanakyapeeth, Tatimara, Chandrapur, Guwahati ban ioh ia ka jingkyrshan bad ka MIMTF kala shu iakren lyngba ka phone.
 ha ka sngi Thohdieng kala pynpaw ia ka jingshaniah skhem ha ki bor pyniaid district bad ka Dorbar Shnong Mawsynram bad ong ba ka jingshim rai jongki ha kaba iadei bad ka Krem Mawjymbuin kan sa batai ia ka sienjam kaba kin shim nangne shakhmat.){kind=link}