Aizawl, Nailar 20 : Ha ka jingpyrshang ban pyniar ia ka iew ka hat shabar ka jylla bad ka ri, ka jylla Mizoram hynnin ka sngi Thohdieng ka la shalan ia u sohtrun ba la pynmih na ka jylla ha ka sien kaba nyngkong eh sha ki jaka iew jong ka pyrthei, ong u heh sorkar.
Ka Mizoram ka la shalan kumba 230 kilo u Sohtrun uba dang shu kheit shapoh Dubai, United Arab Emirates (UAE), kata hadien ba u Symbud Myntri Rangbah ka jylla u Tawnluia ula kaweh ia ka lama kum ka dak ka jingshalan kaba nyngkong ia une u soh na Aizawl hynnin ka sngi Thohdieng, ong u heh sorkar.
Ia kine ki sohtrun la rep da ki paid nongrep hapoh ka shnong Sialhawk ha ka thain mihngi ka Khawzawl district ka Mizoram.
Haba kren ha ka jingialang kaba lyngkot ha katei ka sngi, u Tawnluia uba dei ruh u MLA jong katei ka constituency, u la ong ba ka jingpynkhreh ka dang iaid shakhmat na ka bynta ban shalan ia u sohtrun ba la pynmih na Sialhawk sha ka nongbah Doha ka Qatar bad kumjuh sha Bahrain, ka ri dewlynnong ha ka thain sepngi ka Asia.
Ula ong ruh ba na ka liang ka sorkar jylla kan shim ia ki sienjam ban pyniasoh lyngba ki lynti surok sha baroh ki jaka rep sohtrun kiba don hapoh ka constituency ka jong u bad ruh ban pynioh ia ki iew ki hat na ka bynta ki nongrep lada ki lah ban pynmih kham bun shuh shuh.
Na ka liang u vice chairman ka tnat horticulture ka jylla uba dei ruh u nongmihkhmat ka party synshar Mizo National Front (MNF) u F. Lalnunmawia ula pyrto ia kane ka sienjam kum u mawmer ha ka histori ka Mizoram.
Katkum u secretary ka tnat horticulture ka jylla, u K. Lalthawmmawia la ong ba ia kine ki sohtrun yn thied da ka Fair Exports (I) Private Limited, ka ba dei ka tnat jong ka Lulu Group International, ha Mumbai ha ka dor T. 30 shi kilo, bad na Mumbai kin pynpoi sha Dubai.
Ula ong ruh ba sa kumba 900 kilo u sohtrun na Sialhawk yn shalan shapoh Dubai, bad 740 kil sha Qatar bad Bahrain tang ha kine ki khyndiat por ki ban wan.
Shuh shuh ula ong ruh ba ki nongrep kin hap ban shim ia ki sienjam ban khmih halor ka jingbha jong kine ki soh khnang ban lah ban pynneh ha ki jaka iew jong ka pyrthei.
Ki nongshong shnong ka Sialhawk kila sdang ban rep sohtrun ha ka snem 2002, bad haduh kumba 320 tylli ki longiing ki rep haduh kumba 6,400 quintal u sohtrun ka ba la kot sha ka T.95 lak ha kane ka snem ba la dep.Na ka liang ki nongrep ki kyrmen ba kin lah ban rep haduh 10,000 quintal u sohtrun mynta ka snem.
