Shillong, Lber 14: Uwei u heh ophisar shipai jongka Assam Regimental Centre (ARC) ula shah kynnoh ba ula leh khlem akor bad ka byrngem ban pynthohbria ia ka longrynnieng jongka kurim jong u ophisar shipai uba rit ha ka kyrdan.
Ka nongujor kaba dei ka kurim jong u ophisar uba bat ia ka kyrdan Colonel, kala ujor ha Madanrting Police Station ha ka 10 tarik u Lber ban pynpaw ia ki jingjia ki bym iahap bad ka jingkren tohmet, ka jingktah kti bad ka jingbyrngem ka jong u heh ophisar shipai.
Katei ka nongujor kala kynnoh ba katei ka jingshah leh donbor kala jia ha ka miet jongka 8 tarik u Lber ha ka por ba don ka jingbam ja lang ha ka Officers’ Mess jongka Assam Regimental Centre. Kala pynpaw ba utei u heh ophisar ula wan tur bunsien sha ka ryngkat bad ka kren da ki ktien ki bym sngewtynnad wat hapdeng ka jingpyrshang ban kiar ia u ban pyni iaka jingbym sngewtynnad. Kane ka jingjia kala nang heh, haba ula sdang ban kren da ki ktien kiba khlem akor bad pyrshang ruh ban ktah kti, hynrei ia kane la lah ban tehlakam noh da u kurim jongka.
Kala kdew ruh ba ha kawei ka jingjia ha ka 13 tarik u Iaiong 2024, ha ka por ba kila leit bam ja, kaba la khot sngewbha da uwei pat u ophisar, utei u heh ophisar ula kren da ki ktien pharshi ia ka. Ha kawei pat ka jingjia ha ka 13 tarik u Naitung 2024, kala kynnoh ba utei u heh ophisar ula pyrshang ban bat jubor ia ka kti jongka hakhmat jong u kurim jongka ha ka por bamja ha ka iing jongka.
Hadien jong ka jingioh pdiang ia ka jingujor, ki pulit kila rejistar case ia une u ophisar hapoh ka Section 75(2) (Sexual Harassment), Section 79 (Insulting the modesty of a woman) bad ha ka Section 351(2) (criminal intimidation) jongka Bharatiya Nyaya Sanhita (BNS), 2023.
Katei ka longkmie kala pynpaw ruh ba ka jingpynslem ban ujor ia ka ejahar kadei namar ba kala shah ktah ha ka jingmut jingpyrkhat na katei ka jingjia bad kala shim por ia ka, ban long biang kumba ka ju long bad ban thoh ia katei ka jingujor. Kala pynpaw ruh ba ka don iaka jingsheptieng iala ka jingim, ka jingpynthohbria ia ka longrynnieng ka jongka bad ka jingshah leh khlem akor khamtam haba une nongleh kam sniew udei uba sah marjan bad ka.
Hynrei na ka liang jong ki bor shipai haduh mynta kim shym la pynpaw eiei halor kane ka jingjia.
 ula shah kynnoh ba ula leh khlem akor bad ka byrngem ban pynthohbria ia ka longrynnieng jongka kurim jong u ophisar shipai uba rit ha ka kyrdan.){kind=link}