Itanagar, Nailar 12 :U nongialam ka seng BJP ha Arunachal Pradesh lem bad laingut kiwei pat ki la shah ujor da ka FIR halor ka jingkynnoh donkti ha ki kam beain ha ka jaka ka ba don hapdeng ka jingiakynad.
Kane ka jingujor FIR ka long pyrshah ia u general secretary ka BJP Arunachal u Ananta Narayan Mishra lem bad ki laingut kiwei pat namar ka jingdonkti ha ki kam beain ha ka jaka ki ba don hapdeng ka jingiakynad hapoh Eko Dumbing/Riwotala.Kine ki jaka ki ba don hapdeng ka jingiakynad ki hap hapoh ka Upper Siang district jong ka Arunachal Pradesh.
Ki laingut kiwei pat ki ba la shah kynnoh donkti ha kane ka FIR, ki kynthup ia u Michung Khamba, u Tendy Lamo bad u Laida Wangchuk.Ia kane ka FIR la ujor pyrshah da ka Seng Simong Community Youth Association (SCYA).
Ha kane ka FIR, ka SCYA ka la kynnoh a utei u nongialam ka BJP bad ia kine ki laingut ki briew halor ka jingpynkhein ia ki kyndon pynneh jingsuk da ka ba ktah ia ka jingsngew niam jong ki trai shnong ki ba dei na ka jaidbynriew Adi.
Ka SCYA ka la kynnoh ruh ba une u nongialam ka BJP ka Arunachal lem bad kine ki laingut ki la pyrshang ban pynkhein ia ka jingiateh soskular hapdeng ki jaidbynriew Adi bad ki nongshong shnong ki ba dei na ka jaidbynriew Memba-Khamba.
“Katba kine ki ar kynhun jaidbynriew ki don hapdeng ka shongsuk shongsain, hynrei kynsan ha ka 30 tarik u Naitung ba ladep, la ioh jingtip ba ka Chimey Yangsang Pemako Society, hapoh ka jingialam jong u Michung Khamba, u Laida Wangchuk bad u Pemako nalor u president ka Youth Association u Tendy Lhamo da ka jingsynran lang da u Mishra lem bad kiwei pat ki la pynlong ka jingleit jurip ka ba sop sop sha katei ka jaka bad sa shisien pat ki la tei ia ki katto katne ki jingtei ha katei ka jaka ka ba don hapdeng ka jingiakynad,” ong ka SCYA.
“Ki la leh ia ki kam beain ha ka jaka ka ba don hapdeng ka jingiakynad lyngba ki jingtrei ha ka jaka kaba kyntang,” kynnoh ka SCYA.
Ka bynta jong ka Eko Dumbing la shim ba ki dei ki jaka ba kyntang na ka bynta ki jaidbynriew Memba-Khamba Buddhist kumjuh na ka bynta ki nongshong shnong ki ba dei na ka jaidbynriew Adi.
