Tura, Iaiong 16 : Ka kynhun Flying Squad jong ka Tnad Election, kala shah thombor hynnin ka miet sngi Nyngkong, ha ka kynhun ki runar katba ki dang leit peit pyrman ia ka jingialang ialap elekshon jong ka TMC ha Tikrikilla.
Ha kane ka jingjia, la iathuh ba uwei u Magistrate jong ka Flying Squad, ula mynsaw.
Kane ka dei ka jingjia ba nyngkong ban ktah kti ia ki nongkhmih ia ka elekshon hapoh ka Tura Lok Sabha seat.
Kane ka kynhun ka la don ha ka Tikrikilla ban khmih ia ka jingialang elekshon jong u kyrtong ka TMC Zenith Sangma. Kane ka jingthombor kala jia hadien ba wai ka jingialang hapdeng ka por 9:30 haduh 10 baje mynmiet.
“Ka rally kala kut ha Iew Tikrikilla khlem kano kano ka jingthut bad baroh ki briew kila sdang ban ialeit phai shala iing hynrei ngi la shong hapoh ka thain namar ka dei ka kamram jong ngi ban khmih ioh don ka jingpynkhein ia ki kyndon. Hynrei kumba 5 ngut ki briew kila wan mih kynsan na ka jaka bad um bad kila thombor ia ngi” ong u Magistrate ka Flying Squad Adison Ch Momin, uba la phlei snam na ka durkhmat namar ka jingshah thombor.
Kine ki briew kila pynpaw ba kila ap ban thombor ia ka kynhun Flying Squad hynrei ki khlem iathuh pat ia ki daw.
Ki lai ngut ki kynhun Flying Squad ba shah thombor ki kynthup ia u Momin, uwei u nongring camera bad uwei u Pulit langrut.
Ha ka mudui sha ki Pulit ha Tikrikilla Police Station, u Adison Momin ula iathuh ba kine ki briew ki dei kiba la buaid bad kila phet bak bak na kane ka jaka ha ka por ba u Pulit langrut ula tur ban leit iarap ia u.
