Williamnagar, Iaiong 17 :Arngut ki samla na Assam ha ryngkat bad u nongniah jong ka kali ba ki shim wai, kila shah pyniap bad shah thang haduh bym ithuh shuh ha ka thain Rogu Alda, kaba hap hapoh ka Rongjeng Police Station, East Garo Hills.
Ia kine ki metiap bala thang la tep ha kawei ka thliew bala tih ha ka thain Ragu Alda kaba jngai kumba 1.5 km na ka surok NH 217 ba pyniasoh ia ka connecting Dudhnoi – Damra – Rongjeng – Baghmara.
Kane ka jingpyniap kaba la jia tang arsngi shuwa ka elekshon, kala pynsuhjer ia ki nongshongshnong jong ka thain.
Ka khubor Pulit ka iathuh ba kine ki lai ngut ki briew kila mih na Goalpara ha ka step sngi Ba-ar bad ka jingiakren briew ba khatduh eh jong ki, lyngba ka phone ka dei ha ka por 6 baje mynstep ha ka por ba ki phone ia la ki bahaing ba ki dang iabam jingbam step ha surok hadien ba rung sha East Garo Hills lyngba ka surok Damra-Dainadubi-Wageasi sha Rongmil.
Ki bahaiing jong ki, kila khuslai hadien ba baroh lai ngut kim shym la phone shuh baroh shisngi bad kumta, kila pyntip mar mar sha ki Pulit ba kin iarap wad lem.
Ki Pulit ha ka jingtohkit, kila lap ia ka kali maruti swift kaba ki shimwai na kawei ka khlaw siej ha ka thain Rogu Alda bad kane ka kali kala ingkhong khait na ka jingshah thang.
Ki Pulit kila pynjur ia ka jingtohkit ha kane ka jaka bad shem ba kane hi ka dei ka jaka bala pyniap ia kine ki briew bad ki runar kila thang ia ka met hashuwa ba kin tep ha kawei ka thliew bala tih.
Kine ki arngut ki kyrteng u Zahidul Islam bad u Jamor Ali. La iathuh ba u Zahidul Islamu dei uba ju donkti ha ki kam tih kali ha Dudhnoi bad Krishnai bad u dang don kawei ka case NBWA pyrshah ia u ha Krishnai Police Station.
La iathuh ba u Jamor Ali ruh u dei uba donkti ha ka kam tuh masi kaba hap hapoh ka thain Matia Police Station, Assam.
Ki Pulit ki suba jur ba kane ka jingshah pyniap ka lah ban dei na ka jingiakput hapdeng ki nong tuh kali bad nongtuh masi.
Ki Pulit kila register case ia kane ka jingjia hapoh ka Rongjeng PS Case No. 8(4)2024 hapoh ka kyndon 302/201/435/34 IPC.
