Shillong, Naitung 09 : Ka Tnad Meghalaya Police kala wengkam shipor (sospon) ia uwei u Sub Inspector bad 4 ngut ki Langrut ( UB constable) ka Sohra Police Station, namar ka jingdonkti ban pynshitom be-ain ia uwei u samla 19 snem hapoh ka thanad.
Ka Tnad kala resgiter mukotduma kam bymman ruh pyrshah ia kine ki Pulit ha Sohra Police Station bad la pynngat ia ki hapoh ka kyndon 120 (1)/3(5) BNS.
Ia kane la pyntip da u Superintendent of Police ka East Khasi Hills Bah Vivek Syiem hadien ka jingiohpdiang ia ka kaiphod jingtohkit, kaba la khlieh da u Sub Divisional Police Officer (SDPO), Pynursla Bah B Wanswett, MPS, kaba la aiti hynne ka sngi Balang.
Une u Heh Pulit u pyntip ba ka jingtohkit ia kane ka mukotduma kam bymman bala register pyrshah ia kine ki 5 ngut ki Pulit, la khlieh da u Ophisar ha ka kyrdan Inspector, uba dei na kawei pat ka Police Station khnang ban pynthikna ia ka jingtohkit ka bym shah liang.
Kane ka sienjam ka Tnad Pulit kala wan jia ruh shisngi hadien ba ka Meghalaya Human Rights Commission (MHRC) kala pan kaiphod na u Superintendent of Police halor kane ka jingjia, haba bthah ban aiti hapoh ka 31 tarik u Naitung.
Ka dei ha ka 7 tarik Naitung, u Superintendent of Police ka EKH, ula iohpdiang ia ka ejahar na ka kong Mildred Jyrwa ba kynnoh ba u Khun jong ka (Getwin Jyrwa), ula shah pynshitom be-ain ha ki Pulit ka Sohra Police Station haduh ba ula mynsaw jur.
Ka pyntip ba ha ka 3 tarik Naitung, kala leit aiti ia la u khun sha ki Pulit ka Sohra PS hadien ka jingioh jingtip ba ki Pulit kila wan wad ia u ha Iing. Kane ka Longkmie kala leit aiti ia u khun ha ka por 9 baje mynstep bad ynda kala leit shaw ha ka por janmiet, kala lap pynban ia u Khun hapdeng ka jingmynsaw jur namar ka jingshah bom shah tied dusmon ha ki Pulit ha Sohra Police Station.
Hadien ba sei ia u na Thanad, la ialam noh ia u sha Sohra CHC bad hadien la pynkit noh sha Shillong Civil Hospital ba un ioh ia ka jingsumar ba kham paka.
Haba iathuh ia kane ka jingjia naduh kaba sdang, u Bah Vivek u pyntip ba ha ka 1 tarik Naitung, ki Pulit ka Sohra PS kila ioh pdiang ia ka ejahar na u Rangbah Shnong ka Mawkisyiem, Sohra, ba pyntip ia ka jingshoh briew bad byrngem byrsit u Getwin Jyrwa ha Mawap, Mawkisyiem. La iathuh ba une u samla ula pyndonkam ia ki ktien khlem akor bad leh khlem rain ruh hakhmat uba bun balang.
U Bah Vivek u iathuh ba wat hapdeng ka jingkhot hajir haduh arsien da ka Dorbar Shnong Mawkisyiem, u Getwin Jyrwa u khlem leit mih satia bad dei halor kane ba la ujor noh da ka ejahar.
U iathuh ba halor ka ejahar, ki Pulit ka Sohra kila register case hapoh ka kyndon 131/133/296 (a) jong ka BNS pyrshah ia une u samla. U iathuh ba ki Pulit kila leit wad ia une u samla ha ka miet 2 tarik hadien ka jingioh jingtip ba u don ha Iing hynrei une u samla ula ioh phet shuwa ban poi ki Pulit.
U iathuh ba dei ha ka sngi kaba bud por 11 baje mynstep ba ka Kmie Kong Mildred kala wan aiti ia u hapoh Thanad.
U Bah Vivek ula ban jur ba ka Tnad Pulit ka iengskhem ha ka nongrim ban bat ia ka Ain bad ban pynthikna ia ka jingtrei kam kaba don jingkitkhlieh ha ki kyrdan bapher bapher. Ula ong ba ka Tnad kan leh da kaba tyngeh pyrshah ia kino kino ki Pulit kiba pyndonkam bakla ia ka bor.
 ia uwei u Sub Inspector bad 4 ngut ki Langrut ( UB constable) ka Sohra Police Station, namar ka jingdonkti ban pynshitom be-ain ia uwei u samla 19 snem hapoh ka thanad.){kind=link}