Shillong, Nailur 28 : Ki Pulit ka Assam kila siat iap ia 4 ngut ki snar runar ha ka jingiather kuli hajan Ghiladubi, kaba don marjan ka khappud Assam-Meghalaya ha ka thain ka Goalpara District. Kane kala jia ha ka miet sngi Saitjain.
Kine kiba iap ki dei kiba kyrteng kum u Mukunda Rabha, Subur Ali, Zahidul Islam bad u Chengbat Marak.
Ki Pulit ki iathuh ba kane ka kynhun runar ki dang pynkhreh ban lute ia uwei u nongkhaii ka thain. Ki Pulit kila pynlong ia ka jingkhynra haba ioh ia kane ka jingtip bad ia kane ka jingkhynra la ialam da u SP ka Goalpara Navaneet Mahanta bad u SP ka South Salmara-Mankachar Abhilash Barua.
Katba ka kynhun ki Pulit ka adang tur, kane ka kynhun ki runar kila ther kuli, kaba la pynbor ia ki Pulit ban pynphai kylliang. Ha kane ka jingther kuli, arngut kila iap hashen katba arngut kila mynsaw jur bad khlad noh hadien ba poi ha Dhupdhara Model Hospital.
“Ngi la ioh kurup ia 4 tylli ki pistol, ki kuli, ka kali bad katto katne tylli ki mobile phone na kane ka jaka ba iather kuli. Ha ka jingtohkit la lap ba kane ka kynhun runar ka dei kaba donkti ha kiba bun ki kam tuh bad khaii tiar siat ha ka thain” ong ki Heh Pulit.
Dang shen, uwei u snar nonglute ba kyrteng u Rajibul Ali, ula shah siat iap ha ki Pulit ha ka jingkhynra kaba jia ha Matia.
