Guwahati, Nailar 30: Kawei ka skul Madrassa ba shimet ha Dhakali para, hapoh Barpeta district ka Assam hynnin ka sngi Nyngkong kala shah pynpra noh ha ki bor pyniaid ka district, kata hadien ba ka sorkar kala kam ba la tei beain ia kane ka skul ha ka jaka sorkar.
Kane ka skul Madrassa ka dei kaba don ka jingiadei bad ki arngut ki briew kiba la shah kem noh ha ki pulit ha Barpeta halor ka jingkynnoh don jingiadei bad ka kynhun seng lehnoh Al-Qaeda in the Indian Subcontinent (AQIS) ia kaba ki pulit ka Assam ki dang pynlong ka jingtohkit.
Ki arngut ki shipara, u Akbar Ali bad u Abdul Kalam Azad kila shna hi ia kane ka skul Madrassa bala ai kyrteng ‘Jamiul Huda Academy Madrassa’, ia kaba ki pulit kila kam ba la tei beain ia ka ha ka jaka sorkar.
Kine ki arngut shipara kila shah kem noh ha ki pulit ka Barperta ha kane ka sngi Saitjain ba la lah.Na ka liang ki pulit kila kam ba kine ki arngut kiba la don hapdeng ka jingphet rieh naduh u bnai Lber ba la dep ki dei ki nongsylla ba hakhmat eh ha ki jingtreikam jong katei ka kynhun ha Barpeta, bad kiba la aijingkyrshan ha kaba iadei bad ka leit ka wan bad ha kiwei pat ki rukom na ka bynta ki dkhot kiba dei na Bangladesh ia kiba la kam ba kila don hapdeng ka jingphet rieh.
La kynnoh ruh ba kine ki arngut kila pynbiang ia ki da ka kali na ka bynta ban leit ban wan ha ki thain shathie ka Assam.Na ka liang ki bor pulit kila ioh ruh ban kurup noh ia kane ka kali, ong ka tyllong khubor pulit.
Ki tyllong khubor pulit kila ong shuh shuh ba ia katei ka skul Madrassa bala pynpra la pyndonkam ruh da uwei u nong Bangladesh, u Mohammad Sumon uba la shah kem noh kham hashwa.
Une u dei uwei na ki nongsylla ba hakhmat eh ha lyndet ki tnat treikam jong ka kynhun ba la kyrshan da ka AQIS hapoh Assam bad u dei ruh u dkhot jong ka kynhun seng lehnoh ba la khein beain, ka Ansarullah Bangla Team lane ABT, kaba dei ka kynhun seng lehnoh napoh Bangladesh.
