Shillong, Lber 30: Hynne ka sngi u Blei, la pynlong ia ka Episcopal Ordination ne ka jingpyntang Bishop ia u Fr Bernard Laloo ha ka Cathedral of Mary Help of Christians, Laitumkhrah.
La pynkyntang ia u Fr Bernard Laloo kum u Auxiliary Bishop jong ka Archdiocese of Shillong, da u Leopoldo Girelli, Apostolic Nuncio sha ka ri India bad Nepal, u Archbishop Victor Lyngdoh, ki heh ki hain, ki nongsharai Balang bad ki paid riewngeit Katholik na kylleng kila wan ban sakhi ia kane ka jingpynkyntang Bishop.
U Fr Bernard Laloo ula shah thung kum u Bishop, ha u Pope Francis ha ka 8 tarik u Rymphang 2025.
La kha ia u Bishop Bernard Laloo ha ka 16 tarik u Jylliew 1976 ha Laitlyngkot bad ula shimti ia ka kam phadar ha ka 30 tarik u Iaiong 2006 bad ula ai ia ka jingshakri ka jongu ha ka Archdiocese bad ula bat ruh ia ki kyrdan kiba kongsan kiba kynthup kum u Assistant jongka St. Paul’s Church, Upper Shillong, Administrator jongka Christ the King College, Shillong, Dean of Studies ha St. Paul’s Seminary, Shillong, Principal jongka Divine Saviour Higher Secondary School, Laitumkhrah, Director jongka Social Service Centre, Shillong bad Chancellor jongka Archdiocese. Ula shakri ruh kum u Parish Priest jongka Cathedral of Mary Help of Christians, Laitumkhrah.
U Bishop Laloo ula pyndep ia ka jingpule ia ka Bachelor of Arts bad ula pyndep ruh ia ka Master of Arts ha ka Sociology. Ula pyndep ruh ia ka Post Graduate Diploma ha ka Counselling Psychology. Nalor ki kam shakri ia ka Blei, ula noh synniang ruh na ka bynta ka bha ka miat jong ka imlang sahlang, ula ong ruh u dkhot jong ka Farmers’ Commission bad ka State Tuberculosis Co-morbidity Coordination Committee jong ka sorkar jylla.
Ha kane ka jingpynkyntang Bishop, ki nongsharai Balang na kylleng ki jaka kila wan ban iashimbynta bad la wan ruh ban sakhi lang da u Myntri Rangbah ka jylla u Conrad Sangma bad u Symbud Myntri Rangbah ka jylla u Bah Prestone Tynsong kiba la ai khublei kyrpang ia u hadien ka jingshimti ia ka kam Bishop.
Hadien ba la pyndep ia ka jingpynkyntang Bishop, la pynbud da kaba pynlong ia ki prokram bapher bapher.
