Guwahati, Risaw 12 : Namar ka jingther jong u ‘lapbah hapoh Arunachal Pradesh naduh kine ki khyndiat sngi ba la dep, ki jingshlei um kiba thymmai nalor ki jingtwa khyndew kila wan jia ha ki thain ba sha them hapoh ki laitylli ki district ka thain shatei ka Assam ha kaba ka jingkiew um hapoh ka wah Brahmaputra ruh kala jan kot ha u lain jingma.
Katkum ka Assam State Disaster Management Authority (ASDMA), la ong ba haduh 46 tylli ki shnong ha ki phra tylli ki revenue circle jong ka Dhemaji, Dibrugarh bad Lakhimpur district kila ngat ha ka jingeh namar ki jingjia jong ka jingshlei um kaba la ktah ia kumba 33,836 ngut ki nongshong shnong kat haduh mynta.
Na ka liang u heh ka tnat Water resources ha Dibrugarh ula pyntip ba ka wah Brahmaputra kala tuid ha ka kynjang kaba 105.17 mitar kat haduh ka por 5 baje jan miet jong ka sngi ba Ar, kata kaba la jan kot ha u dak jingma kaba long ha ka kynjang kaba 105.70 mitar.
Ha kawei pat ka bynta ki jingtwa khyndew ba shyrkhei lyngba ka wah Brahmaputra kala pynkhyllem noh ia ka bynta jong ka jingker kaba iar ha ki bynta jong ka Maijan ha ki bynta ba pajih na Dibrugarh hynnin ka sngi ba Ar kaba la buh ruh ha ka jingma kaba khraw ia kane ka sor rit kaba la don 180 snem mynta.
Ka jingkiew um ha ka wah kala wanrah ka jingtwa khyndew ba shyrkhei ha ki bynta jong ka jingker jong ka wah Brahmaputra ha ki bynta jong ka Nagaghuli-Maijan bad kaba la wanrah ruh ka jingklumar jingmut bad ka jingsyier hapdeng ki nongshong shnong jong kane ka thain.Katkum ki trai shnong la ong ba kane ka wah kala tuid ha ka kynjang kaba haduh 150 mitar na katei ka jingker jong ka wah tang ha kine ki ar sngi ba la dep.
Namar ka jinglong jingman kaba donkam kyrkieh, na ka liangk i bor district kila wad ia ka jingiarap lem jong ki nongtrei bylla na ki bynta ba marjan ka Maijan bad najan ki jaka shong shnong jong ki nongrep slasla na ka bynta ban maramot ia katei ka jingker jong ka wah.
Haduh kumba 500 ngut ki nongtrei na ki jaka rep slasha kila wan ban trei da ka mon sngewbha.Namar ka jingkhlain jong ka um kaba la bteng ban sangah tyngeh ia ka jingker jong ka wah, na ka liang ki trai shnong kila pynpaw ia ka jingsyier ba tang hadien katto katne por baroh kane ka jingker ka lah ban shah jynrah ha ka wah.
U Manob Munda uba dei u president jong ka Nagakhuli Gorakhonia Samity ula ong ba dang ha kine ki khyndiat sngi ba la dep ka jingtwa khyndew kala iai bteng ha ki bynta jong ka Maijan-Nagakhuli.Kumba phra tylli ki longiing kila kylla khlem iing khlem sem namar kane ka jingjia.Wat hadien ka jingiai kyrpad, hynrei na ka liang ka tnat ba dei khmih kala pulom ban shim ia ki lad jingiada.
Na ka liang u MLA ka Dibrugarh, u Prasanta Phukan ula ong; “Ka thong kaba hakhmat eh ka jong ngi ka long ban iada ia ka jingker jong ka wah, kata watla kala don lypa ka bynta jong ka jingker kaba la shah jynrat ha ka wah.Ka jinglong jingman ka long kaba ma shibun.Lada ka wah kn jynrat ia baroh kawei ka jingker, kumta ruh baroh ki jaka ba marjan kaba kynthup ia ka Assam Medical College and Hospital bad ka Dibrugarh Airport kin shong halor jong ka rum.Ka jingma kaba hadien ka long ia ka sor rit Dibrugarh.Ki sienjam kiba thmu ban iada na kane kim pat shym la long kiba seisoh haduh mynta hi.”
“Ngi la pyrshang ban tehlakam ia kane ka jingtwa khyndew da kaba pynap da ki pla fibre kiba rahbah ha trai jong ka jingker, hynrei namar ka jingjylliew jong ka um ka long kumba 12 mitar kumta ruh kine ki pla kila shah jynrat noh.Ia kane ka um la hap ban pynrngat shwa,” ong shuh shuh u MLA ka thain.
