Shillong Nailar 18: U Myntri ka Rep ka Riang Bah Banteidor Lyngdoh hynne ka sngi palei, u la ong ba kumba 2 ne 3 lak ngut ki nongrep tang ha East Khasi Hills, kila shah ktah jur namar ka jingbym ioh ban pyndonkam iaka dawai sboh Urea ha ka kam rep kam riang.
Katei ka jingkren u Bah Banteidor Lyngdoh kala mih hadien ba u la lum iaka jingialang bad ki nongrep ka East Khasi Hills ban iasyllok ha kaba iadei bad ka jingshah ktah ka rep ka riang na ka jingbym pyndonkam iaka dawai sboh.
“Naduh ba khang ban pyndonkam ia ki dawai sboh urea ha u 2014 bad jingpynduh ka sorkar ia ka subsidy, ki nongrep kila hap thied ia ka sboh dawai nalade ha ka dor kaba rem” ong u Bah Banteidor.
U Myntri u ong ba ki nongrep hi ki shem jingeh ban pynmih bun ia ki marrep khlem ka dawai sboh bad namar ka jingrem ka dor ba hap thied hi nalade, ki nongrep kiba bun hi kila rep tang ban ioh bam ialade ym shuh ban khaii sha kiwei pat ki Jylla.
“Mynshwa ki Nongrep ki thied ia ka urea tang T.500 namar ki ioh lang ia ka subsidy naka sorkar hynrei hadien ba khang, kila hap ban thied hapdeng ka dor T.1200 haduh T.1700” ula ong haba pyntip “Mynta ki nongrep kin sa ioh biang iaka dawai sboh da kaba leit thied na MECOFED bad ia kane ka dawai sboh yn aiti sha ki Block kiba shah ktah jur ” .
Haba pyntip ba ka jingktah jong ka jingkhang ia ka sboh urea ka long tang ha ki katto katnje ki Block ha East Khasi Hills, u Myntri ula ong “Kat kum ki jingkhein ba ngi ioh, ki don kumba 2 lak tam ne haduh 3 lak ki nongrep ba shah ktah bad kine ki dei kiba na ka Block Mawryngkneng, Mawkynrew, Khatar Shnong, Laitkroh, Mylliem, Sohiong bad Mawphlang kiba rep ia marrep ki bapher”.
Haba pynkynmaw ba ha u snem 2014, ka sorkar kala pynmih iaka hukum ban pynsangeh noh ia ka jingthied dawai urea bad ban ai Subsidy.
“Mynta watla la shah pyndonkam biang, hynrei ka sorkar kan ym shah ban die pathar ia ka dawai sboh hynrei yn die tang ha ki Block kiba la shah ktah jur ha ka rep ka riang” ula ong.
Kat kum ka jingong jong u,“Ïa u phan, kubi bad sohsaw khlem ka Urea yn ym lah satia ban pynmih bun bad ki nongrep kiba rep ia kine ki marrep ym dei ba ki bam ialade hynrei ki dei kiba die bad shalan shabar jong ka jylla bad da ki hajar ton ki die ha ka shi bnai”.
“Mynta ki nongrep ki rep tang ka nam bad kim don jingioh nong shuh kumta ka sorkar jylla kan pyntreikam da ka skhim kaba thymmai kaban ai jingiarap shi rta ia ki nongrep jong ngi” la ong u Myntri ka rep ka riang.
Haba kylli halor ka kam rep khlem khleh dawai ne Organic Farming, u Myntri ula ong “Ka jingrep khlem ka jingpyndonkam iaka dawai sboh ka dei ban iaid shakhmat hynrei ha ki jaka kiba la rep mynta la palat 20 ne 25 snem da ka dawai sboh yn ym lah ban pynkylla ia ki ban rep khlem ka dawai sboh”.
U Myntri u pyntip ba ka rai jong ka sorkar bala pynmih iaka jingpynbna paidbah ha ka 9 tarik u Nailar 2022 kam dei sati aka ban ai jingmyntoi shimet iano iano hynrei kadei ka jingmyntoi naka bynta ki nongrep ka Jylla.
