Shah ktah jur ka Sohra bym poi shuh ki nongjngohkai namar ka jingiakhih ka AKMTTA

Shillong, Nailur 18: U General Secretary ka United Democratic Party (UDP) bad MDC ka Sohra constituency bah Titosstarwell Chyne u la ong ba ka Sohra namar ba ka dei ka jaka jngohkai pyrthei kaba pawnam, ka la shah ktah jur na ka jingiakhih ka All Khasi Meghalaya Tourist Taxis Association (AKMTTA) kaba la pyrshah ia ka jingwan kit nongwan shangkai pyrthei daki kali nabar Jylla.

Haba kren sha ki lad pathai khubor u Bah Titos ula ong ba ka ioh ka kot jong katei ka thain kaba shaniah shibun ha ka kam jngohkai pyrthei, mynta ka kynti kala kynduh ia ka jingduhnong kaba khraw namar ka jingbym don ki nongwan shangkai pyrthei hapoh ka thain.

Ula ong ba ki kam khaii ha ka thain, kynthup ki hotel, ki homestay, ki restaurant kila mad ka jingeh namar ka jingbym poi ki nongwan shangkai pyrthei.

Ka jingiakhih jong ka AKMTTA kaba la sdang dang shen, ka la wanrah ia ka jingpynkut noh ia ka jingbuh jaka sah jong ki nongwan shangkai pyrthei haki Hotel, Guest House bad Homestay bad kane kala ktah ia ka kamai kajih jong ki briew kiba shaniah ha ka kam jngohkai pyrthei ha Sohra.

U la ong ba watla ki jingdawa jong ka AKMTTA ki long kiba don nongrim hynrei ka rukom iakhih kan nang ktah shuh ia ki jaka jngohkai pyrthei ha ka Jylla khamtam ia ka Sohra.

“Ki paidbah jong ka Sohra hadien ba la khang noh ïa ka Mawmluh Cherra Cement Ltd (MCCL), kim don lad shuh ban kamai hynrei ki shaniah pura ha ka kam jngohkai pyrthei. Bun ki riew shimet, ki kynhun bad ki kompeni ki la sdang ïa la ki jong ki Hotel, ki Guest House, Homestay da kaba shim ram na ki bank bapher bapher bad ki tnat Tourism ka sorkar hynrei kane ka jingiakhih ka AKMTTA kan ktah ïa ka lawei ruh namar ba ki nongwanshang pyrthei kin sa sngewsih bad kin sngew ba kam long kaba shngaiñ ban wan sha kine ki jaka jngohkai pyrthei namar kin sngew ba kin don shibun ki jingeh ha ka lynti dei na kata ka daw ba katkum ka jingtip ba la lum, baroh ki nongjngohkai pyrthei ki la pynsangeh noh ïa ki booking jong ki” la ong u Bah Titos da kaba bynrap “Lada kane ka bteng kan nym ktah tang ïa ki briew kiba don bynta haka kam jngohkai pyrthei hynrei kan ktah ruh ïa ki jaka die sha, ki briew kiba die jingdie ha ki jaka jngohkai pyrthei, ki dhaba, ki jaka bam bad kiwei kiwei.”

U Nongialam ka UDP u la kyrpad ia ka AKMTTA ban wan sha ka miej ban iakren, da kaba pdiang ia ka jingkhot iakren jong ka Sorkar jylla ha ka 23 tarik Nailur.

U la pynskhem ruh ia ka jingdonkam ia ka polisi kaba shai ban pynbeit ia katei ka jingeh, da kaba ai nuksa na kiwei pat ki jylla kum ka Sikkim bad Odisha, kiba la pyntreikam ia ki polisi kiba treikam bha ban pyniaid ia ki kali kamai Tourist.

U bah Titos u la ai jingmut ba ka tnat transport ryngkat bad kiwei kiwei ki tnat ki dei ban don bynta lang ban wad ia ka lad ban weng ia kane ka jingeh.

U la ban jur ba ka polisi lane ka rukom treikam kaba shai ka long kaba donkam khnang ban lait na kum kine ki jingïakajia ha ki por ban wan bad ban pyntikna ïa ka jingïaid beit ïaid ryntih jong ka kam jngohkai pyrthei ha ka jylla.

U MDC u la kyntu ia ka Sorkar jylla ba kan shimkhia bha ia katei ka jingeh bad ban pynthikna ba kano kano ka jingiakynduh bad ka AKMTTA kan wanrah ia ka jingkular ban pynbeit iaki jingeh. “Ka jingpynbeit ka long kaba donkam ban iada ia ka jingmyntoi jong ki nongshong shnong bad ka kam jngohkai pyrthei” ula ong.

“Lada ym don ka polisi kaba shai, kane ka jingeh kan sa mih hi. Lada phi ong ba ki kali Assam kim lah ban rung sha Meghalaya te ka Assam ruh kan ong kumjuh. Dei na kata ka daw ba ka don ka jingeh halor kane ka mat dawa ka Association, kumta ka sorkar ka dei ban khot kyrkieh iaka jingialang ban iathir sani iaki jingeh” u la bynrap.